قازاقستاندا ەسىرتكى قىلمىسىنا قاتىستى ىستەر بويىنشا 69 كامەلەتكە تولماعان ءجاسوسپىرىم ۇستالدى، دەپ حابارلايدى infohub.kz سايتى. ىشكى ىستەر مينيسترلىگىنىڭ مالىمەتىنشە، 40 ءجاسوسپىرىم ەسىرتكى ساتقانى ءۇشىن، 27ء-سى اسا ءىرى مولشەردە ساقتاعانى ءۇشىن، تاعى ەكەۋى تىيىم سالىنعان زاتتاردى جارنامالاپ، ناسيحاتتاعانى ءۇشىن جاۋاپقا تارتىلدى. ۇستالعانداردىڭ اراسىندا 52 ۇل جانە 17 قىز بار.
ۆەدومستۆو اتا-انالار مەن زاڭدى وكىلدەرگە بالالاردىڭ مىنەز-قۇلقىنداعى وزگەرىستەردى مۇقيات قاداعالاۋدى سۇراپ ۇندەۋ جاسادى. ءىىم ەسىرتكى قىلمىسىنا قارسى ءىس-قيمىل كوميتەتى باسقارماسىنىڭ باستىعى باقىتجان ءامىرحانوۆ ءجاسوسپىرىمنىڭ ەسىرتكىنىڭ زاڭسىز اينالىمىنا تارتىلعانىن كورسەتۋى مۇمكىن بەلگىلەردى اتادى.
«ءسىزدى اسىرەسە مىنالار الاڭداتۋى ءتيىس: كەنەتتەن اقشا نەمەسە قىمبات زاتتاردىڭ پايدا بولۋى، تەلەفون مەن حات-حابارداعى جاسىرىندىق، ءتۇرلى نىسانداردىڭ كۇماندى سكرينشوتتارى»، — دەدى ءامىرحانوۆ.
ونىڭ ايتۋىنشا، جاسوسپىرىمنەن تابىلعان ورامالار، شاعىن پاكەتتەر، يزولەنتا نەمەسە ەلەكتروندىق تارازى دا جاعدايعا نازار اۋدارۋعا سەبەپ بولۋى مۇمكىن. ءىىم وكىلى اتا-انالارعا بالانىڭ بوس ۋاقىتىن قالاي وتكىزەتىنىن، مەسسەندجەرلەردە كىممەن سويلەسەتىنىن جانە الەۋمەتتىك جەلىلەردە كىمگە جازىلعانىن ءبىلىپ وتىرۋعا كەڭەس بەردى.
ءامىرحانوۆ ەسىرتكى قىلمىسى ءۇشىن قىلمىستىق جاۋاپكەرشىلىك 16 جاستان باستالاتىنىن ەسكە سالىپ، اتا-انالاردى بالالاردىڭ قۇقىقتىق تاربيەسىنە قاتىسۋعا شاقىردى.
جاڭا وقۋ جىلىنىڭ باسىنان بەرى پوليسەيلەر ەلدەگى بارلىق دەرلىك مەكتەپتەر مەن وزگە دە وقۋ ورىندارىندا 16 مىڭ پروفيلاكتيكالىق ءىس-شارا وتكىزدى. ولاردىڭ 5 مىڭنان استامى پەداگوگتەردىڭ، پسيحولوگتەردىڭ جانە ناركولوگ دارىگەرلەردىڭ قاتىسۋىمەن ءوتتى.
بۇعان دەيىن «كۋرسيۆ» قاراعاندىدا ەر ادامنىڭ تايلاندتان ەسىرتكى جەتكىزۋدى ۇيىمداستىردى دەپ كۇدىككە ىلىنگەنىن جازعان بولاتىن. قارجىلىق مونيتورينگ اگەنتتىگىنىڭ دەرەگىنشە، ول ءبىر سالەمدەمەنى الۋ ءۇشىن تانىس ءجاسوسپىرىمدى تارتىپ، جونەلتىلىمدى ونىڭ اتىنا راسىمدەگەن.