قازاقستاندا ءبىر ورتاشا جالاقىعا شامامەن 79 كەلى ىرىمشىك ساتىپ الۋعا بولادى — بۇل ەۋرازيالىق ەكونوميكالىق وداق (ەاەو) ەلدەرىنىڭ ىشىندەگى ەڭ تومەن كورسەتكىش. سالىستىرساق: بەلارۋستە سول جالاقىعا 127 كەلى، رەسەيدە 120 كەلى ىرىمشىك الۋعا بولادى، دەپ حابارلايدى infohub.kz سايتى.
بۇعان دەيىن قازاقستان ىرىمشىك ءوندىرىسىن ارتتىرىپ، ءتىپتى ءونىمنىڭ ءبىر بولىگىن باسقا ەلدەرگە ەكسپورتتايتىنى حابارلانعان. الايدا حالىق ءۇشىن ىرىمشىك ونىمدەرى ەاەو-عا مۇشە باسقا مەملەكەتتەرگە قاراعاندا قىمباتىراق بولىپ شىقتى.
ەۋرازيالىق ەكونوميكالىق كوميسسيانىڭ مالىمەتىنشە، قازاقستاندا ءبىر ورتاشا نومينالدى جالاقىعا 79 كەلى قاتتى، جۇمساق نەمەسە ۇيىتقى ىرىمشىك ساتىپ الۋعا بولادى — بۇل وداقتاعى ەڭ تومەن كورسەتكىش.
ىرىمشىكتىڭ قولجەتىمدىلىگى بويىنشا كوش باستاعان — بەلارۋس: مۇندا ءبىر جالاقىعا 127 كەلى جەتەدى. ودان كەيىن رەسەي تۇر — 120 كەلى. ارمەنيادا جالاقى 116 كەلى، ال قىرعىزستاندا 92 كەلى ىرىمشىك ءونىمىن الۋعا مۇمكىندىك بەرەدى.
ءسۇت ونىمدەرىندە دە جاعداي ۇقساس. ءبىر جالاقىعا ورتاشا قازاقستاندىق 764 ليتر تۇتاس ءسۇت ساتىپ الا الادى — بۇل قىرعىزستانداعىدان (511 ليتر) كوپ، ءبىراق ەاەو-نىڭ باسقا ەلدەرىنەن از.
مىسالى، بەلارۋستە ءبىر جالاقىعا 1 277 ليتر تۇتاس نەمەسە شيكى ءسۇت الۋعا بولادى، ال رەسەيدە 1 181 ليتر. ارمەنيادا اقشا 848 ليترگە جەتەدى.
ىرىمشىك قازاقستاندىقتار ءۇشىن ەاەو-نىڭ باسقا ەلدەرىنىڭ حالقىنا قاراعاندا قىمباتىراق بولىپ شىققان جالعىز ءونىم. قالعانىندا رەسپۋبليكا ءبىرقاتار تاۋاردىڭ قولجەتىمدىلىگى بويىنشا كوش باستاپ تۇر.
ماسەلەن، ەل كارتوپتىڭ قولجەتىمدىلىگى بويىنشا ەرەكشەلەندى: ءبىر ورتاشا نومينالدى جالاقىعا 1 737 كەلى جەتەدى. سالىستىرساق: كارتوپپەن ءجيى بايلانىستىرىلاتىن بەلارۋستە اقشا 1 492 كەلىگە عانا جەتەدى — بۇل ءتىپتى رەسەيدەگى كورسەتكىشتەن (1 565 كەلى) دە از. ودان كەيىن قىرعىزستان (1 133 كەلى) جانە ارمەنيا (740 كەلى) تۇر.
سونداي-اق قازاقستان حالىق ءۇشىن ءبىرىنشى سورتتى بيداي ۇنىنىڭ، ماكاروننىڭ، اق قىرىققاباتتىڭ، قىزاناقتىڭ، ءسابىزدىڭ جانە پيازدىڭ قولجەتىمدىلىگى بويىنشا ءسوزسىز كوش باستادى.
ايتا كەتەيىك، ىرىمشىككە قاتىستى ۇقساس جاعداي بۇعان دەيىن دە بايقالعان. مىسالى، بىلتىر قازاقستان ىرىمشىك ونىمدەرىنىڭ باعاسى بويىنشا تمد ەلدەرىنىڭ بارلىعى دەرلىك دەرلىك اسىپ تۇسكەنى حابارلانعان. وندا «كوشباسشى» پوزيسياسىن مولدوۆا يەلەنگەن.