قازاقستاندا جەر قويناۋىن پايدالانۋشىلار ءۇشىن جاڭا تولەمدى ەنگىزۋ ەكى جىلعا كەيىنگە قالدىرىلماق: 2027 جىلدان باستاپ ەنگىزىلۋى جوسپارلانعان قاتتى پايدالى قازبالارعا رويالتي 2029 جىلدىڭ 1 قاڭتارىنان قولدانىلۋى ۇسىنىلدى. بۇل تۋرالى infohub.kz سايتى حابارلايدى.
شەشىم سالىق كودەكسىن ەنگىزۋ جونىندەگى جوبالىق كەڭسەنىڭ وتىرىسىندا تالقىلاندى. وتىرىستى پرەمەر-مينيستردىڭ ورىنباسارى — ۇلتتىق ەكونوميكا ءمينيسترى سەرىك جۇمانعارين ءتوراعالىق ەتتى.
«سالىق كودەكسىنىڭ جاڭا نورمالارى مينەرالدىق شيكىزات پەن قاتتى پايدالى قازبالاردى، ونىڭ ىشىندە وڭدەلگەندەرىن وتكىزۋ كەزىندە 2027 جىلدىڭ 1 قاڭتارىنان باستاپ رويالتي تولەۋدى كوزدەيدى. بۇل ەرەجە 2026 جىلدىڭ 31 جەلتوقسانىنان كەيىن بەرىلگەن ليسەنزيالار بويىنشا، بۇرىن جەر قويناۋىن پايدالانۋ قۇقىعى بەرىلمەگەن اۋماقتاردا وندىرىلگەن شيكىزاتقا قولدانىلۋى ءتيىس ەدى»، — دەپ ناقتىلادى ۇكىمەتتە.
ونەركاسىپ جانە قۇرىلىس مينيسترلىگى ءبىرقاتار ماسەلەنىڭ ءالى دە قوسىمشا پىسىقتاۋدى قاجەت ەتەتىنىن ايتادى. اتاپ ايتقاندا، تەحنوگەندىك مينەرالدىق تۇزىلىمدەر ءۇشىن سالىق بازاسىن ەسەپتەۋ، ءرويالتيدى اكىمشىلەندىرۋ جانە مولشەرلەمەلەردى ايقىنداۋ تۋرالى ءسوز بولىپ وتىر.
سونداي-اق جاڭا ليسەنزيالاردىڭ ەرەكشەلىكتەرىن، جوبالاردىڭ كاپيتال سىيىمدىلىعىن جانە ىلەسپە كومپونەنتتەردى ءوندىرۋدىڭ رەنتابەلدىلىگىن ەسكەرۋ قاجەت. بۇل ماسەلەلەردى ءارتۇرلى سالالار اراسىندا كەلىسىپ، كاسىپورىنداردىڭ قارجىلىق-ەكونوميكالىق مودەلدەرىندە تەكسەرۋ جوسپارلانۋدا.
بۇعان دەيىن «كۋرسيۆ» قازاقستان ۇكىمەتى گەولوگيالىق زەرتتەۋلەر مەن پەرسپەكتيۆالى پايدالى قازبالار كەن ورىندارىن ىزدەۋگە 40،7 ملرد تەڭگە بولگەنىن جازعان بولاتىن. جۇمىستار 2026-2028 جىلدارعا ارنالعان جانە التىن، مىس، ليتي، سيرەك كەزدەسەتىن ەلەمەنتتەر مەن باسقا دا ستراتەگيالىق ماڭىزدى رەسۋرستاردى قامتيدى.