قازاقستاندا رەسپۋبليكالىق تراسسالارداعى قوزعالىس شەكتەۋلەرى ەندى اۋا رايى كۇرت ناشارلاعانعا دەيىن 3-4 ساعات بۇرىن ەنگىزىلۋى مۇمكىن. بۇل ءتارتىپ ۇكىمەت بەكىتكەن ۆەدومستۆوارالىق ءوزارا ءىس-قيمىل جوسپارىندا قاراستىرىلعان، دەپ حابارلايدى infohub.kz سايتى.
«قازاۆتوجول» ۇلتتىق كومپانياسىنىڭ تۇسىندىرۋىنشە، جول قىزمەتتەرى وقيعادان وزىپ ارەكەت ەتۋگە مىندەتتى: توتەنشە جاعداي تۋىنداعاننان كەيىن ەمەس، ول قوزعالىسقا قاتىسۋشىلارعا ءقاۋىپ توندىرەر الدىندا.
«ەگەر „قازگيدرومەتتىڭ“ بولجامى اۋا رايىنىڭ كۇرت ناشارلايتىنىن كورسەتسە، قوزعالىس شەكتەۋى قولايسىز قۇبىلىستار باستالعانعا دەيىن 3-4 ساعات بۇرىن ەنگىزىلۋى مۇمكىن. بۇل حالىقتى الدىن الا ەسكەرتۋگە جانە جۇرگىزۋشىلەرگە جاعداي كۇرت ناشارلاعانعا دەيىن جول ءجۇرىسىن اياقتاۋعا مۇمكىندىك بەرەدى»، — دەلىنگەن حابارلامادا.
«قازاۆتوجولدىڭ» اقپاراتتىق جۇيەلەرى ياندەكس، 2گيس جانە inDrive پلاتفورمالارىمەن بىرىكتىرىلگەن. رەسپۋبليكالىق تراسسا جابىلعان نەمەسە اشىلعان كەزدە مالىمەتتەر اۆتوماتتى تۇردە جاڭارىپ، مارشرۋت قۇرۋ كەزىندە سەرۆيستەردە ەسكەرىلەدى.
1403 بايلانىس ورتالىعى تاۋلىك بويى جۇمىس ىستەيدى. كوپ كولەمدەگى وتىنىشتەردى جەدەل وڭدەۋ ءۇشىن جاساندى ينتەللەكت تەحنولوگيالارى ەنگىزىلۋدە. جىل باسىنان بەرى 1 ملن-نان استام ءوتىنىش وڭدەلدى، دەپ قوستى ۇلتتىق كومپانيادا.