قازاقستاندا ءۇشىنشى اتوم ەلەكتر ستانسياسىنا «بولاشاق» اتاۋىن بەرۋ ۇسىنىلدى. بۇل باستاما استانادا وتكەن «تەڭ دارەجەدەگى يادرولىق ديالوگ: جاستاردىڭ اتوم سالاسىنا جولى» اتتى ۇلتتىق جاستار ديالوگىندا ايتىلدى، دەپ حابارلايدى infohub.kz سايتى.
بۇل تۋرالى اتوم ەنەرگياسى اگەنتتىگىنىڭ رەسمي وكىلى شىڭعىس يلياسوۆ مالىمدەدى، دەپ جازادى Forbes Kazakhstan.
فورۋم قاتىسۋشىلارىنىڭ پىكىرىنشە، «بولاشاق» اتاۋى اتوم ەنەرگەتيكاسىنىڭ، عىلىم مەن تەحنولوگيانىڭ دامۋىن، سونداي-اق جاڭا بۋىن ماماندارىنىڭ سالانى قالىپتاستىرۋداعى ءرولىن ءبىلدىرۋى ءتيىس.
ءۇشىنشى اەس-كە بۇل اتاۋدى بەرۋ تۋرالى رەسمي شەشىم ازىرگە جوق.
فورۋم ل.ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە ءوتتى. وعان اتوم ەنەرگياسى اگەنتتىگىنىڭ باسشىسى الماسادام ساتقالييەۆ، عىلىم جانە جوعارى ءبىلىم ءمينيسترى ساياسات نۇربەك، ستۋدەنتتەر، جاس ماماندار جانە اتوم سالاسىنىڭ وكىلدەرى قاتىستى.
بۇعان دەيىن قازاقستاننىڭ ءبىرىنشى اەس-ىنە «بالقاش» اتاۋى تاڭدالعان بولاتىن. «كۋرسيۆ» جازعانداي، قازاقستان مەن «روساتوم» ونى الماتى وبلىسىنداعى ۇلكەن اۋىلىنىڭ ماڭىندا سالۋعا EPC-كونتراكتىگە قول قويدى. ستانسيا جالپى قۋاتى 2،4 گۆت بولاتىن ەكى ۆۆەر-1200 ەنەرگوبلوگىنان تۇرادى، ال نەگىزگى قۇرىلىس جۇمىستارىن 2027 جىلى باستاۋ جوسپارلانۋدا.
ءبىرىنشى اەس-تى سالۋعا 2027-2029 جىلدارى رەسپۋبليكالىق بيۋدجەتتەن 818،3 ملرد تەڭگە ءبولۋ جوسپارلانۋدا. جوبانىڭ جالپى قۇنى بۇعان دەيىن $16،4 ملرد دەپ باعالانعان.
سونىمەن قاتار، «مويىنقۇم» جۇمىس اتاۋىمەن ەكىنشى اەس-تى دە بالقاش ماڭىنا ورنالاستىرۋ جوسپارلانۋدا. بۇل جوبا بويىنشا باسىم سەرىكتەس رەتىندە قىتايلىق CNNC قاراستىرىلۋدا.