15 قىركۇيەكتە كوكتەم-جاز 2027 ماۋسىمىنىڭ نيۋ-يورك ءسان اپتالىعى اياقتالدى. ونىڭ ەڭ كوپ تالقىلانعان ساتتەرىنىڭ ءبىرى — پوديۋمعا مودەل دە، كورسەتىلىمگە قاتىسۋشى دا بولماعان قازاقستاندىقتىڭ شىعۋى بولدى، دەپ حابارلايدى infohub.kz سايتى.
قازاقستاننىڭ نيۋ-يوركتەگى كونسۋلدىعى حابارلاعانداي، مانحەتتەن پوديۋمدارىندا ءۇش قازاقستاندىق ديزاينەر — تيمۋر تۇرسىنقۇلوۆ، راۋشان انۋاربەكوۆا جانە سابينا ۆولسكايا ءوز كوللەكسيالارىن ۇسىندى.
تيمۋر تۇرسىنقۇلوۆ اشىق تۇستەر ارقىلى قازاقستاننىڭ مادەني مۇراسىن كورسەتتى. جاس ديزاينەر نەبارى 22 جاستا، ءبىراق ول ءوز كوللەكسيالارىمەن شەتەلدىك ءسان اپتالىقتارىنا قاتىسىپ ۇلگەرگەن. راس، ولاردىڭ بارلىعى جەرگىلىكتى كوممەرسيالىق ءىس-شارالار ەدى: Paris City Fashion Week، MadMood Milano Fashion Week، Mediterranean Fashion Week، Fashion Open Air Berlin. ءدال وسى تاجىريبە وعان الەمدەگى باستى ءسان اپتالىقتارىنىڭ ءبىرى — NYFW-گە قاتىسۋعا مۇمكىندىك بەردى.
راۋشان انۋاربەكوۆا 2023 جىلى ميلان ءسان اپتالىقتارىنىڭ بىرىنە 60+ جاستاعى مودەلدەردى شاقىرىپ، جۇرتشىلىقتىڭ نازارىن اۋدارعان ەدى. وسىدان كەيىن ول 2025 جىلى پاريج جانە ميلان ءسان اپتالىقتارىنا «الەمدى تاڭقالدىرعان قازاق اجەلەرى» اتتى بىرەگەي مادەني جوباسىمەن شاقىرىلدى. ەگدە جاستاعى مودەلدەر NYFW كورسەتىلىمدەرىنە دە قاتىستى.
سابينا ۆولسكايا haute couture كلاسىنداعى بالالار كيىمىنە ماماندانعان. ديزاينەردىڭ ءۇش بالاسى بار، ونى وسى سالاعا ۇلكەن قىزى باستاعان. سابينانىڭ ەسەبىندە يتالياداعى Milan Fashion Week قوسا العاندا، كوپتەگەن شەتەلدىك ءسان اپتالىقتارى بار.
قازاقستاندىق دەلەگاسيا شامامەن 60 ادامنان تۇردى. ونىڭ قۇرامىندا ديزاينەرلەر، مودەلدەر جانە production-كوماندا مۇشەلەرى بولدى. كورسەتىلىمدەرگە قازاقستان ەلشىلىگىنىڭ وكىلدەرى مەن نيۋ-يوركتە تۇراتىن وتانداستار شاقىرىلدى.
ەستە قالعان ساتتەردىڭ ءبىرى — بلوگەر جاسۇلاننىڭ پوديۋمعا كۇتپەگەن شىعۋى. وسكەمەندىك ەر ادام بىرنەشە جىلدان بەرى Instagram-دا اقش-تاعى ءومىردى كورسەتىپ ءجۇر.
«مەن ادەمى كوللەكسيالاردى، سونىڭ ىشىندە ءبىزدىڭ ديزاينەرلەردىڭ دە جۇمىستارىن كوردىم، ءبىراق نەگىزىنەن ايەل وبرازدارى بولدى. ال قازاقستاننىڭ ەرلەر ۇلتتىق وبرازى تابىلمادى. مەن زالدا وتىرىپ، ويلاندىم: جاي عانا قاراپ وتىرا المايمىن. مەن مودەل دە، قاتىسۋشى دا ەمەسپىن، جاي قوناق ەدىم. ءبىراق بۇل — مەنىڭ ەلىم، مەنىڭ مادەنيەتىم، مەنىڭ ماقتانىشىم. سوندا مەن شاپان كيىپ شىقتىم — حايپ ءۇشىن ەمەس، ساحنا ءۇشىن ەمەس، ەرلەر وبرازدارى دا ءبىزدىڭ بىرەگەيلىگىمىزدىڭ ءبىر بولىگى ەكەنىن ەسكە سالۋ ءۇشىن»، — دەپ ءتۇسىندىردى ول ءوز يمپروۆيزاسياسىن.
بۇعان دەيىن Kursiv LifeStyle قازاقستاندىق ديزاينەرمەن سۇحبات جاريالاعان بولاتىن. ول ءوز جۇمىستارىندا ءولىم مەن قورقىنىش ەستەتيكاسىنان شابىت الادى.