«قازاقتەلەكوم» وپەراتورى ەكىباستۇزداعى «دەرەكتەردى وڭدەۋ ورتالىقتارى القابى» جوباسىن جۇزەگە اسىرۋ ءۇشىن بىرنەشە ميلليارد دوللار تارتۋدى كوزدەپ وتىر، دەپ حابارلايدى infohub.kz سايتى.
كومپانيا باسقارما ءتوراعاسى باعدات مۋسين Reuters اگەنتتىگىنە بەرگەن سۇحباتىندا قاراجاتتى وبليگاسيالار، قازاقستاننىڭ دامۋ بانكى جانە حالىقارالىق قارجى ينستيتۋتتارى ارقىلى تارتۋ جوسپارلانىپ وتىرعانىن ايتتى.
«سودتار القابى» جوباسىن ىسكە اسىرۋعا ءبىر ميلليارد دوللارمەن ولشەنبەيتىن ەلەۋلى سومالار قاجەت. بۇل قارجىلاندىرۋدى تارتۋ ءۇشىن ءتۇرلى قۇرالدار، سونىڭ ىشىندە حقو الاڭىنداعى وبليگاسيالار، سونداي-اق قازاقستاننىڭ دامۋ بانكىنىڭ قاراجاتى پايدالانىلۋدا. قاتار حالىقارالىق قارجى ينستيتۋتتارىنان قاراجات تارتۋ جۇمىستارى جۇرگىزىلۋدە»، – دەدى «قازاقتەلەكوم» باسشىسى.
ونىڭ ايتۋىنشا، كومپانيا ءبىرقاتار قىتايلىق جانە امەريكاندىق ينستيتۋتتارمەن قارجىلاندىرۋ تارتۋ تۋرالى كەلىسسوزدەر جۇرگىزۋدە. الايدا قاراجاتتىڭ ناقتى كولەمى مەن تارتۋ مەرزىمدەرى ازىرگە بەلگىسىز.
ەسكە سالايىق، قازاقستان Firebird Inc. كومپانياسىمەن NVIDIA قاتىساتىن ەسەپتەۋ جوبالارى بويىنشا كەلىسىم جاساسقان. قازاقستانداعى «بولاشاق سودتار القابى» جوباسى 10 ميلليارد دوللار ينۆەستيسيا تارتۋى ءتيىس. دەرەكتەردى وڭدەۋ ورتالىقتارىن قۇرۋ ءۇشىن NVIDIA كومپانياسىنىڭ گرافيكالىق پروسەسسورلارىنا نەگىزدەلگەن سەرۆەرلەر پايدالانىلادى.
دەرەكتەردى وڭدەۋ ورتالىقتارىنىڭ قۋاتى كەمىندە 300 مۆت بولىپ، ول 1 گۆت-قا دەيىن ارتۋى مۇمكىن.