ساباقتىڭ تاقىرىبى: قىسقى كيىمدەر.
ساباقتىڭ ماقساتى: بالالارعا كيىم، كيىم تۇرلەرى، قىسقى كيىمدەر تۋرالى تۇسىنىك بەرۋ. قىسقى كيىمدەردى اجىراتا بىلۋگە ۇيرەتۋ.
ويىن ويناۋ ارقىلى ويلاۋ قابىلەتتەرىن دامىتۋ.
سويلەم قۇراتۋ ارقىلى سوزدىك قورلارىن مولايتۋ.
كيىمدى ۇقىپتى، تازا كيۋگە تاربيەلەۋ.
كورنەكىلىگى: دۇكەننىڭ ماكەتى، ءتۇرلى كيىمدەردىڭ سۋرەتتەرى، قۋىرشاق، ساندىق.

وقۋ - ءىس ارەكەتىنىڭ بارىسى:
ءى. كىرىسپە ءبولىم.
بالالار جىلۋلىق شەڭبەرىنە تۇرىپ، ءبىر - بىرىنە جىلى لەبىزدەرىن بىلدىرەدى.
سۇراقتارعا جاۋاپ الۋ:
- ءقازىر جىلدىڭ قاي مەزگىلى؟ قىستا تابيعاتتا قانداي وزگەرىستەر بولادى؟ قىس مەزگىلىندە قالاي كيىنەمىز؟ (بالالار تولىق جاۋاپ بەرەدى).
- ءبىزدىڭ ساباققا قوناققا قۋىرشاق اينۇر كەلىپ وتىر. ول جاي كەلگەن جوق. ساندىعى تولى كيىمدەرمەن كەلىپتى.

سەندەر مۇقيات قاراڭدارشى، اينۇر ۇستىنە قانداي كيىمدەر كيىپتى؟
- قالىڭ كيىم كيگەن.
- كيىمدى قاي مەزگىلگە ساي كيگەن؟
- قىس مەزگىلىنە ساي كيىپتى.
- ولاي بولسا، بالالار، بۇگىنگى ساباعىمىزدىڭ تاقىرىبى – قىسقى كيىمدەر.

ءىى. نەگىزگى ءبولىم.
ا) - بالالار، اينۇر سەندەرگە بىرنەشە كيىمدەر الا كەلىپتى. سونى تاراتىپ بەرەمىن. ال سەندەر كيىمدەرگە سيپاتتاما بەرەسىڭدەر. مىسالى، مالاقاي - قۇلاعى بار جىلى باسكيىم، قۇلاقشىن. (سۋرەت العان بالالار وسىلايشا سويلەم قۇراپ ايتادى).

ءا) سوزدىك جۇمىسىن جۇرگىزۋ.
پيما - جۇننەن باسىلعان قىسقى اياقكيىم.
تون – يلەنگەن قوي تەرىسىنەن ءجۇنىن ىشىنە قاراتىپ تىككەن جىلى سىرت كيىم.
ىشىك – ءىش جاعى اڭنىڭ تەرىسىنەن تىگىلىپ، سىرتىن ماتامەن تىستاعان جىلى سىرت كيىم.
بايپاق – ەتىكتىڭ ىشىنەن كيەتىن، جۇقالاۋ ەتىپ باسىلعان قونىشتى كيىز ش ۇلىق.

ب) سەرگىتۋ ءساتى: توڭسا ءبىزدىڭ قولىمىز،
قولعاپتى كيىپ الامىز.
سارت - سارت – سارت،
شاپالاقتى سوعامىز.
توڭسا ءبىزدىڭ اياعىمىز،
ەتىكتى كيىپ الامىز.
توپ – توپ – توپ،
توپىلداتىپ بيلەيمىز.

ۆ) «دۇكەندە» سيۋجەتتى - ءرولدى ويىنى. ويىننىڭ شارتى: دۇكەن سورەلەرىندە قىسقى كيىمدەر: تون، پيما، قولعاپ، كۇرتە، تۇر. قىسقى كيىم ىزدەگەن بالا دۇكەنگە كەلىپ، ساتۋشىمەن ادەپتى تۇردە امانداسىپ، سورەلەردەن وزىنە قاجەتتى كيىمدى تاڭدايدى. ول تاڭداعان كيىمىن الىپ، سول كيىمگە بايلانىستى سويلەم قۇراۋ كەرەك. دۇكەنشىنىڭ وسى تاپسىرماسىن ورىنداعان كەزدە عانا كيىمدى الا الادى. مىسالى: قىستا قالىڭ تون كيەمىز.

تون، پيما، قولعاپ، كۇرتە، تەلپەك
گ) «بالالارعا ارنالعان كيىم دۇكەنى» تاقىرىبىندا مازمۇندى سۋرەت بويىنشا اڭگىمە قۇراستىرۋ.
د) ءو. اقىپبەك ۇلىنىڭ «مەنىڭ كيىمدەرىم» اتتى ساناماعىن جاتتاتۋ.
«1» دەگەنىم – بورىك،
كيسەڭ بويعا كورىك.
«2» دەگەنىم – ەتىك،
كيەر ءساندى ەتىپ.
«3» دەگەنىم – ىشىك،
تەرىدەن تىگەر ءپىشىپ.
«4» دەگەنىم – تىماق
قىستا كيسەڭ جىلى - اق.
«5» دەگەنىم – بايپاق،
ءىشى جىلى تايپاق.

ءىىى. وقۋ ءىس - ارەكەتىن قورىتىندىلاۋ.
ا) سۇراقتارعا جاۋاپ الۋ.
ءا) «نە ارتىق؟» ديداكتيكالىق ويىنى.
- ءبىر قاتاردا تۇرعان كيىمدەردىڭ ىشىندەگى قايسىسى ارتىق؟
- تۋفلي ارتىق. ويتكەنى ءتۋفليدى كۇز، كوكتەم، مەزگىلدەرىندە عانا كيەمىز.
ب) – بۇگىنگى ساباقتا قىسقى كيىمدەر تۋرالى اڭگىمەلەدىك. ولاردى باسقا كيىمدەردەن اجىراتا بىلەتىن بولدىق. كيىمدى ءار جەرگە لاقتىرماي، كىر قىلماي تازا ۇستاۋ وزدەرىڭە بايلانىستى. كيىمدى كۇتىپ تازا ۇستاپ جۇرەيىك!