قىزارىپ، سۇرلانىپ،
لۇپىلدەپ جۇرەگى.
وزگەدەن ۇرلانىپ،
ءوزدى-وزى كەرەگى.

ەكى اسىق قۇمارلى،
ءبىر جولدان قايتا الماي.
جولىقسا ول زارلى،
ءسوز جوندەپ ايتا الماي.

اياڭداپ اقىرىن،
جۇرەكپەن الىسىپ،
سىبدىرىن، تىقىرىن،
كوڭىلمەن تانىسىپ.

دەم الىس ىسىنىپ،
ساۋساعى سۋىنىپ.
بەلگىسىز قىسىلىپ،
ءپىشىنى قۇبىلىپ.

يىعى ءتيىسىپ،
تۇمانداپ كوزدەرى.
ۇندەمەي ءسۇيىسىپ،
ماس بولىپ وزدەرى.

جانىندا جاپىراق،
ۇستىندە جۇلدىز دا.
ەلبىرەپ-قالتىراپ،
جىگىت پەن ول قىز دا.

وزگە ويدان تىيىلىپ،
بىرىمەن ءبىرى اۋرە.
جۇرەككە قۇيىلىپ
جان راحات ءبىر ساۋلە.

جۇرەگى ەلجىرەپ،
بۋىندار بوسانىپ.
راحاتپەن السىرەپ،
كوزىنە جاس الىپ.

جۇيرىك ءتىل، تەرەڭ وي،
سول كۇندە قايدا ەدىڭ؟
عاشىققا مويىن قوي،
جەڭىلدىڭ، جەڭىلدىڭ!..

---