ءبىرىنشى قازاندا قازاقستاننىڭ التى قالاسىندا اۋا رايى قولايسىز مەتەورولوگيالىق جاعداي قالىپتاسادى، اۋا لاستانۋى مۇمكىن. بۇل تۋرالى «قازگيدرومەتكە» سىلتەمە جاساپ، infohub.kz سايتى حابارلادى.
سينوپتيكتەردىڭ دەرەگىنشە، قولايسىز مەتەوجاعداي اتىراۋ، اقتوبە جانە وسكەمەندە، ال تۇندە الماتى، جەزقازعان جانە بالقاشتا كۇتىلەدى.
قولايسىز مەتەوجاعداي جەلسىز تىنىق اۋا رايى، ءالسىز جەل، تۇمان جانە تەمپەراتۋرالىق ينۆەرسيا كەزىندە قالىپتاسادى. مۇنداي اۋا رايىندا لاستاۋشى زاتتار اتموسفەرانىڭ جەرگە جاقىن قاباتىندا جينالىپ، اۋا ساپاسىن ناشارلاتادى.
لاستانۋ دەڭگەيىنە جاۋىن-شاشىن، ىلعالدىلىق جانە اۋا تەمپەراتۋراسى دا اسەر ەتەدى. قولايسىز مەتەوجاعداي كەزىندە تىنىس الۋ جانە جۇرەك-قان تامىرلارى اۋرۋى بار ادامدار ءوز سەزىمىن ەرەكشە باقىلاۋى كەرەك.
تۇرعىندارعا كوشەدە، اسىرەسە كولىك قوزعالىسى قارقىندى جولدار مەن لاستانۋ كوزدەرىنىڭ ماڭىندا از ۋاقىت بولۋعا كەڭەس بەرىلەدى. بالالار مەن جۇكتى ايەلدەرگە ۇزاق سەرۋەندەۋدەن باس تارتقان ءجون.
سوزىلمالى اۋرۋى جانە اللەرگياسى بار ادامدارعا قاجەتتى دارىلەرىن قاسىندا ۇستاۋعا كەڭەس بەرىلەدى. اشىق اۋاداعى سپورتپەن شۇعىلدانۋدى مۇمكىندىگىنشە عيمارات ىشىنە كوشىرگەن دۇرىس.
بۇعان دەيىن «كۋرسيۆ» 1 قازاندا قازاقستاننىڭ ءبىرقاتار وڭىرىندە داۋىلدى ەسكەرتۋ جاريالانعانىن جازعان. سينوپتيكتەر جاڭبىر، نايزاعاي، تۇمان جانە قاتتى جەل كۇتىپ وتىر، كەي جەرلەردە ءورت ءقاۋپى جوعارى جانە توتەنشە دەڭگەيدە ساقتالادى، دەپ حابارلايدى «قازگيدرومەت».