23 قىركۇيەكتە الماتى مەن قازاقستاننىڭ تاعى 13 قالاسىندا قولايسىز مەتەورولوگيالىق جاعداي (قمج) كۇتىلەدى. بۇل تۋرالى «قازگيدرومەت» حابارلادى، دەپ جازادى infohub.kz.
سينوپتيكتەردىڭ مالىمەتىنشە، قمج پاۆلودار، پەتروپاۆل، كوكشەتاۋ، اقتوبە جانە الماتىدا، ال تۇندە قوستاناي، قاراعاندى، بالقاش، تەمىرتاۋ، وسكەمەن، سەمەي، ريددەر، اتىراۋ جانە استانادا بولجانادى.
مامانداردىڭ تۇسىندىرۋىنشە، قولايسىز مەتەوجاعداي جەلدىڭ تىنىشتىعى، ءالسىز جەل، تۇمان جانە تەمپەراتۋرالىق ينۆەرسيا قوسىلعاندا پايدا بولادى. ناتيجەسىندە لاستاۋشى زاتتار اتموسفەرانىڭ جەرگە جاقىن قاباتىندا جينالىپ، اۋا ساپاسىنىڭ ناشارلاۋىنا اكەلۋى مۇمكىن.
سينوپتيكتەر مۇنداي كەزەڭدەردە دەنساۋلىققا تەرىس اسەر ەتۋ ءقاۋپى ارتاتىنىن، اسىرەسە سوزىلمالى اۋرۋى بار ادامدار ءۇشىن ءقاۋىپتى ەكەنىن ەسكەرتەدى.
اۋانىڭ لاستانۋ دەڭگەيىنە جەلدىڭ جىلدامدىعى، جاۋىن-شاشىن، ىلعالدىلىق جانە اۋا تەمپەراتۋراسى اسەر ەتەدى.
تۇرعىندارعا سىرتتا، اسىرەسە اۆتوجولدار مەن باسقا دا لاستانۋ كوزدەرىنىڭ جانىندا، از ۋاقىت بولۋ ۇسىنىلادى. بالالار مەن جۇكتى ايەلدەرگە ۇزاق سەرۋەندەۋدەن باس تارتۋ كەڭەس ەتىلەدى.
تىنىس الۋ جانە جۇرەك-قان تامىرلارى اۋرۋلارى بار ادامدارعا، سونداي-اق اللەرگياسى بارلارعا قاجەتتى دارىلەردى وزدەرىمەن الىپ ءجۇرۋ ۇسىنىلادى. اشىق اۋاداعى دەنە بەلسەندىلىگىن شەكتەپ، مۇمكىندىگىنشە جاتتىعۋلاردى جابىق عيماراتتارعا كوشىرۋ كەرەك.
بۇعان دەيىن «كۋرسيۆ» 23 قىركۇيەكتە نايزاعايلى جاڭبىر، تۇمان، شاڭدى داۋىل جانە جەلدىڭ 20 م/س-قا دەيىن كۇشەيۋى كۇتىلەتىنىن جازعان بولاتىن.