قازاقستان رەسپۋبليكاسى قورعانىس مينيسترلىگى جەلىدە تاراعان ۆيدەودا اسكەري كيىم كيگەن ادامداردىڭ اباتتاندىرۋ جۇمىستارىمەن اينالىسقانى كورىنگەننەن كەيىن قىزمەتتىك تەرگەۋ باستادى، دەپ حابارلايدى infohub.kz.
ەgovpress Instagram-پاراقشاسىندا ەكى بولىككە بولىنگەن ۆيدەو جاريالاندى. ءبىرىنشى بولىمدە اسكەري كيىم كيگەن جاس جىگىتتەردىڭ كولىكتە كەلە جاتقانى كورىنەدى؛ كەيبىرى ۇيىقتاپ جاتىر. ەكىنشى بولىمدە سول ادامداردىڭ اۋلادا جۇمىس ىستەپ جاتقانى كورسەتىلگەن. ۆيدەونىڭ سيپاتتاماسىندا: «قۇزىرلى ورگاندار اسكەري كيىم كيگەن جاس جىگىتتەردىڭ نەگە تۇسىنىكسىز نىساننىڭ قۇرىلىسىمەن اينالىسىپ جاتقانىن تۇسىندىرەدى دەپ ۇمىتتەنەمىز»، — دەلىنگەن.
NUR.KZ ءتىلشىسى قورعانىس مينيسترلىگىنىڭ ءباسپاسوز قىزمەتىنە ساۋال جولدادى. ۆەدومستۆو ءبىرىنشى ءبولىم شىمكەنتتەگى اسكەري-تەحنيكالىق مەكتەپ تىڭداۋشىلارىنىڭ اسكەري تەحنيكامەن تاكتيكالىق ساباققا شىعۋىن كورسەتەتىنىن جانە بۇل كادردىڭ ەكىنشى بولىمگە قاتىسى جوق ەكەنىن ءتۇسىندىردى. مينيسترلىك وكىلدەرىنىڭ ايتۋىنشا، ەكىنشى ءبولىم اسكەري-تەحنيكالىق مەكتەپتىڭ شىمكەنت فيليالى اۋماعىندا وتكەن جوسپارلى ساياباق-شارۋاشىلىق كۇنىن بەينەلەگەن.
قورعانىس مينيسترلىگىنىڭ تۇسىندىرۋىنشە، مۇنداي كۇندەرى بەكىتىلگەن اۋماقتار مەن نىسانداردا ءتارتىپ ورناتۋ، ءۇي-جايلاردى جيناۋ، تەحنيكاعا قىزمەت كورسەتۋ جانە شارۋاشىلىق-تۇرمىستىق جۇمىستاردى ورىنداۋ جۇرگىزىلەدى. «كادرلاردا اسكەري-تەحنيكالىق مەكتەپ تىڭداۋشىلارى وقۋ ورنىنىڭ اۋماعىن اباتتاندىرۋ جانە كۇتىپ-ۇستاۋ جۇمىستارىنا قاتىسۋدا. سونىمەن قاتار ق ر قورعانىس مينيسترلىگى وسى فاكت بويىنشا تىڭداۋشىلاردى اتالعان جۇمىستاردى ورىنداۋعا تارتۋدىڭ بەلگىلەنگەن ءتارتىبىنىڭ ساقتالۋىن تەكسەرۋ ءۇشىن قىزمەتتىك تەرگەۋ تاعايىندادى. تەكسەرۋ ناتيجەلەرى بويىنشا لاۋازىمدى تۇلعالاردىڭ ارەكەتتەرىنە قۇقىقتىق باعا بەرىلەدى. ەگەر بۇزۋشىلىقتار انىقتالسا، كىنالىلەر قولدانىستاعى زاڭناماعا سايكەس جاۋاپكەرشىلىككە تارتىلادى»، — دەدى مينيسترلىكتە.