قوستاناي وبلىسىندا بانك قىزمەتكەرلەرى مەن پوليسەيلەر شەتەلدىك شوتقا 1،9 ملن تەڭگە اۋدارىلۋىنىڭ الدىن الدى. ەگدە جاستاعى ەر ادام TikTok جەلىسىندە 30% جەڭىلدىكپەن اۆتوكولىك ساتىلاتىنى تۋرالى حابارلاندىرۋدى كورىپ، اقشا جىبەرۋگە بەل بۋعان، دەپ حابارلايدى infohub.kz سايتى.
بانك قىزمەتكەرلەرى كليەنتتىڭ الاياقتاردىڭ قۇربانى بولۋى مۇمكىن ەكەنىن سەزىپ، پوليسياعا حابارلاسقان. كەلگەن ءتارتىپ ساقشىلارى اۋدارىمدى توقتاتىپ، ەر ادامدى وبلىستىق پوليسيا دەپارتامەنتىنە الىپ بارىپ، ءتۇسىندىرۋ جۇمىستارىن جۇرگىزدى.
انىقتالعانداي، حابارلاندىرۋدى كورگەن سوڭ ەر ادام بەيتانىس ادامدارمەن بايلانىسقان. ءارى قارايعى سويلەسۋ WhatsApp ارقىلى جۇرگەن: اڭگىمەلەسۋشىلەر وعان نۇسقاۋلىق بەرىپ، اقشانى تەزىرەك اۋدارۋعا كوندىرگەن.
ەر ادام پوليسيادا ەكەنىن ايتقان كەزدە، وعان بەلسەندى تۇردە جازىپ، اۋدارىمدى اياقتاۋ ءۇشىن دەرەۋ كەتۋىن تالاپ ەتە باستاعان. ۆەدومستۆونىڭ مالىمەتىنشە، اڭگىمەلەسۋشىلەر ونى قورقىتۋعا دا تىرىسىپ، اۆتوكولىك كەدەندە تۇرعانىن جانە تولەمدى كەشىكتىرۋ ماسەلەگە اكەپ سوعاتىنىن ايتقان.
اۋدارىم جۇزەگە اسپادى، 1،9 ملن تەڭگەنى ساقتاپ قالۋ مۇمكىن بولدى.
پوليسيا تاۋارلار مەن اۆتوكولىكتەر تۋرالى كۇدىكتى تۇردە ۇلكەن جەڭىلدىكتەرمەن جاريالانعان حابارلاندىرۋلارعا سەنبەۋگە، بەيتانىس ادامداردىڭ نۇسقاۋلارىن ورىنداماۋعا جانە بەيتانىس شوتتارعا اقشا جىبەرمەۋگە شاقىردى. كۇمان تۋىنداسا، سويلەسۋدى توقتاتىپ، 102 نومىرىنە حابارلاسىپ پوليسياعا جۇگىنۋ كەرەك.
بۇعان دەيىن «كۋرسيۆ» رەسەيدەن قازاقستانعا 106 ملن تەڭگەدەن استام سوماعا الاياقتىق جاسادى دەگەن كۇدىكتىنىڭ ەكستراديسيالانعانىن جازعان. تەرگەۋ نۇسقاسى بويىنشا، ول 2021-2022 جىلدارى شەتەلدەن اۆتوكولىكتەردى ساتىپ اكەلۋگە ۋادە بەرىپ، ءۇش ادامنىڭ اقشاسىن يەمدەنگەن. كۇدىكتى قاماۋ يزولياتورىنا قامالدى.