قازاقستاننىڭ ءۇش ءىرى ۇيالى بايلانىس وپەراتورى — Beeline، Kcell جانە Tele2 — قوستاناي وبلىسىنداعى تۇزەۋ مەكەمەلەرىنىڭ اۋماعىندا ۇيالى بايلانىس سيگنالىنىڭ تىم قۋاتتى بولۋىنا بايلانىستى اكىمشىلىك جاۋاپكەرشىلىككە تارتىلىپ، ايىپپۇل سالىندى، دەپ حابارلايدى infohub.kz سايتى.
وبلىس پروكۋراتۋراسىنىڭ مالىمەتىنشە، تەكسەرۋدى پروكۋرورلار راديوجيىلىك جونىندەگى ماماندارمەن جانە كولونيا باسشىلىعىمەن بىرلەسىپ جۇرگىزگەن. ماماندار كولونيالارداعى ۇيالى بايلانىس قۋاتىن ولشەدى. ناتيجەلەر ءۇش تۇزەۋ مەكەمەسىندە دە Beeline، Kcell جانە Tele2/Altel سيگنالدارىنىڭ شامادان تىس قۋاتتى بولىپ، رۇقسات ەتىلگەن نورمالاردان ايتارلىقتاي اسىپ كەتكەنىن كورسەتتى.
زاڭ بويىنشا ۇيالى بايلانىس وپەراتورلارى ءوز مۇنارالارىن تۇرمەلەر اۋماعىندا بايلانىس باسەڭدەتىلەتىندەي نەمەسە بارىنشا ازايتىلاتىنداي ەتىپ وزدەرى رەتتەۋگە مىندەتتى. الايدا كومپانيالار بۇل تالاپتى ەلەمەگەن. سوڭىندا پروكۋراتۋرانىڭ ارالاسۋىنان كەيىن ءۇش وپەراتور دا اكىمشىلىك جاۋاپكەرشىلىككە تارتىلىپ، ايىپپۇل سالىندى.
قاداعالاۋ ورگانى مۇنداي بايلانىس قولجەتىمدىلىگى ناقتى قىلمىستارعا اكەپ سوعاتىنىن اتاپ ءوتتى. كولونيالاردا سمارتفوندى ەركىن پايدالانعان سوتتالعاندار بىرنەشە رەت انىقتالعان.
پروكۋراتۋرانىڭ حابارلاۋىنشا، جازاسىن وتەپ جاتقانداردىڭ ءبىرى كامەرادان تۇرىپ-اق تەلەفون الاياقتىعىن جاساپ، ادامداردى 4 ميلليون تەڭگەگە الداعان. ونىڭ تەلەفونى تاركىلەنىپ، جاڭا قىلمىسى ءۇشىن ەر ادام قىلمىستىق كودەكس بويىنشا جاۋاپ بەرۋگە ءماجبۇر.
بۇعان دەيىن «كۋرسيۆ» ەلىمىزدە بجزق اتىن پايدالانىپ تەلەفون الاياقتىعى جيىلەگەنىن جازعان. الاياقتار ادامدارعا قور قىزمەتكەرى رەتىندە حابارلاسىپ، زەينەتاقى ەسەبىنە قوسىلماعان بىرنەشە جىل ەڭبەك ءوتىلىن انىقتاعانىن ايتادى. الاياقتار بجزق بولىمشەسىنىڭ ناقتى مەكەنجايىن اتاپ، ەلەكتروندىق كەزەكتى برونداۋدى ۇسىنادى.