قوستانايدا تۇرعىن ءۇيدىڭ اۋلاسىندا پوليسيا قىزمەتكەرىن اياۋسىز سوققىعا جىلۋ ءىسى بويىنشا سوت پروسەسى باستالدى. ايىپتالۋشىلار لاۋازىمىندا ءۇش جاس جىگىت وتىر، دەپ حابارلايدى infohub.kz سايتى.
Almaty تەلەارناسىنىڭ مالىمەتىنشە، وقيعا بيىلعى جىلدىڭ ناۋرىز ايىنىڭ سوڭىندا بولعان. ءتارتىپ ساقشىسىن سوققىعا جىلۋدىڭ بەينەجازباسى الەۋمەتتىك جەلىلەردە لەزدە تاراپ، كەڭ قوعامدىق رەزونانس تۋدىردى. ەر ادام بالالارىمەن ۇيدەن شىعىپ، ولاردى كولىككە وتىرعىزىپ، اۋلادا سپيرتتىك ىشىمدىك ءىشىپ وتىرعان ماس جىگىتتەر توبىنا ەسكەرتۋ جاساۋ ءۇشىن جاقىنداعانى حابارلانعان. سوزبە-سوز ايتىس ۇرىسقا ۇلاسقان.
پروكۋرور ەركەبۇلان ايتبايەۆ وتىرىس بارىسىندا: «ك. د.-نى ۇستاۋعا شوعىرلانعان جانە ءوزىن قورعاۋ مۇمكىندىگى شەكتەۋلى بولعان، قاسىندا تۇرعان كولىككە جاقىنداپ، جابىرلەنۋشىگە جۇگىرىپ كەلىپ، ك.-نىڭ باسى مەن دەنەسىنە وڭ اياعىمەن كەمىندە 4 رەت ادەيى سوققى جاساعان. سوققىلار جەتكىلىكتى كۇشپەن، ومىرلىك ماڭىزدى دەنە مۇشەلەرىنە جاسالعان، ناتيجەسىندە ك. ەسىن جوعالتقان»، — دەدى.
ماس جىگىتتەر توبى پوليسەيدى ول ەسىن جوعالتقاننان كەيىن دە سوققىلاۋدى جالعاستىرعان. ناتيجەسىندە ەر ادام مي شايقالۋى جانە جاراقاتتار العان. ايىپتالۋشىلار لاۋازىمىندا 20 بەن 25 جاس ارالىعىنداعى ءۇش جاس جىگىت وتىر. ولارعا بيلىك وكىلىنە قاتىستى ءومىرى مەن دەنساۋلىعىنا ءقاۋىپتى زورلىق-زومبىلىق قولدانۋ، ادامدار توبىمەن جاسالعان دەگەن ايىپ تاعىلۋدا.
العاشقى وتىرىستا جابىرلەنۋشىنىڭ ادۆوكاتى ءىستى پروكۋرورعا قايتارۋ تۋرالى ءوتىنىش ءبىلدىردى. «مەن كۋاگەرلەردى جاۋاپقا تارتۋدى سۇرادىم، كوپتەگەن ادامدارعا، سونىڭ ىشىندە جابىرلەنۋشىنىڭ وزىنە قاتىستى بەتت-دە تىركەۋ تۇرىندەگى پروسەسسۋالدىق شەشىم قابىلداۋدى سۇرادىم»، — دەپ ءتۇسىندىردى ادۆوكات ولەگ برانسيەۆ.
سونىمەن قاتار، قورعاۋشى ىستە جەتى توم بار، الايدا ايىپتالۋشىلارعا تانىسۋ ءۇشىن تەك التى توم بەرىلگەنىن اتاپ ءوتتى. كەلەسى وتىرىس 16 قىركۇيەككە بەلگىلەنگەن. وسى ۋاقىتقا دەيىن ايىپتالۋشىلار ءىس ماتەريالدارىن تولىعىراق زەردەلەي الادى. كىناسى دالەلدەنگەن جاعدايدا، جاس جىگىتتەرگە 10 جىلدان 15 جىلعا دەيىن باس بوستاندىعىنان ايىرۋ جازاسى ءقاۋىپ ءتونىپ تۇر.
ەسكە سالايىق، ناۋرىز ايىنىڭ سوڭىندا مەسسەندجەرلەردە قوستانايداعى بەرەكە شاعىن اۋدانىندا 28 ناۋرىز تاڭەرتەڭ جاستار توبى ءتارتىپ بۇزۋشىلىق تۋرالى ەسكەرتۋ جاساعان پوليسەيدى سوققىعا جىققانى تۋرالى اقپارات تاراعان. پوليسيادا بارلىق كۇدىكتىلەر انىقتالىپ، وقيعا ورنىندا ۇستالعانىن حابارلادى. بيلىك وكىلىنە شابۋىل جاساۋ فاكتىسى بويىنشا قىلمىستىق ءىس قوزعالدى. كەيىن سوت ءۇش كۇدىكتىگە قاتىستى ەكى ايعا قاماۋعا الۋ سانكسياسىن بەردى.
24 تامىزدا پروكۋراتۋرا كوپقاباتتى ءۇيدىڭ اۋلاسىندا پوليسەيدى سوققىعا جىلۋ ءىسىن سوتقا جىبەرگەنى بەلگىلى بولدى.