قوستانايدا جول جۇمىستارى كەزىندە جاياۋ جۇرگىنشىنى قاعىپ ولتىرگەن ارنايى تەحنيكا جۇرگىزۋشىسىنە ۇكىم شىعارىلدى: ەر ادام باس بوستاندىعىنان ايىرىلدى، دەپ حابارلايدى infohub.kz سايتى.
«الاۋ» باسىلىمى بۇعان دەيىن جازعانداي، قايعىلى وقيعا 27 ساۋىردە كيەۆسكايا كوشەسىندە بولعان. وسى فاكتى بويىنشا قىلمىستىق ءىس قوزعالدى.
باسىلىم مالىمەتىنشە، وقيعا ءجۇرىس بولىگىنىڭ شەتىن تەگىستەۋ جۇمىستارى كەزىندە ورىن العان. ايىپتاۋ نۇسقاسىنا سايكەس، 36 جاستاعى تيەگىش جۇرگىزۋشىسى كەرى ءجۇرىپ، مانەۆردىڭ قاۋىپسىزدىگىنە كوز جەتكىزبەي، 82 جاستاعى ەر ادامدى قاعىپ كەتكەن. العان جاراقاتتارىنان جاياۋ جۇرگىنشى وقيعا ورنىندا كوز جۇمدى.
اتاپ وتىلگەندەي، سوققىدان كەيىن جۇرگىزۋشى ءوزى جەدەل جاردەم مەن پوليسيا شاقىرعان، ال تەرگەۋ بارىسىندا بولعان جاعدايدى انىقتاۋعا كومەكتەسكەن. ابايسىزدىقتان ادام ولىمىنە اكەپ سوققان جول قوزعالىسى ەرەجەلەرىن بۇزۋداعى كىناسىن تولىق مويىندادى.
سوت جەڭىلدەتەتىن ءمان-جايلار رەتىندە سوتتالۋشىنىڭ وكىنۋىن جانە ونىڭ اسىراۋىندا كامەلەتكە تولماعان بالالارىنىڭ بولۋىن ەسكەردى. اۋىرلاتاتىن ءمان-جايلار انىقتالعان جوق. جابىرلەنۋشى تاراپ مەملەكەتتىك ايىپتاۋشى ۇسىنعان جازامەن كەلىستى.
ناتيجەسىندە ارنايى تەحنيكا جۇرگىزۋشىسىنە ەڭ تومەنگى قاۋىپسىزدىك دەڭگەيىندەگى قىلمىستىق-اتقارۋ جۇيەسى مەكەمەسىندە 2،5 جىل باس بوستاندىعىنان ايىرۋ جازاسى تاعايىندالدى.
ۇكىم ازىرگە زاڭدى كۇشىنە ەنگەن جوق.