قوستاناي وبلىسىنىڭ مەندىقارا اۋداندىق سوتى زەينەتاقى جيناقتارىنىڭ 16 ملن تەڭگەدەن استام قاراجاتىن زاڭسىز اۋدارۋ تۋرالى قىلمىستىق ءىستى قارادى، دەپ حابارلايدى infohub.kz سايتى.
قوستاناي وبلىسى سوتتارىنىڭ رەسمي Telegram-ارناسىندا جازىلعانداي، سوتتالۋشى ءۇشىنشى تۇلعالاردىڭ پايداسىنا تولەم قۇرالىن پايدالانىپ، ماتەريالدىق سىياقى ءۇشىن اقشا اۋدارۋدى زاڭسىز جۇزەگە اسىردى دەپ ايىپتالدى. بۇل ارەكەت ءىرى مولشەردە جاسالعان (قىلمىستىق كودەكستىڭ 232-1-بابىنىڭ 6-بولىگى).
سوت 2025 جىلدىڭ قاراشاسىنان 2026 جىلدىڭ قاڭتارىنا دەيىنگى ارالىقتا سوتتالۋشى جەكە كاسىپكەردىڭ مەديسينالىق قىزمەتپەن اينالىسۋعا قاجەتتى ليسەنزياسى جوقتىعىن بىلە تۇرا، بانكتەن تۇسكەن ءبىرىڭعاي زەينەتاقى تولەمدەرىنە قاتىستى اقشا وپەراسيالارىن ۇيىمداستىرعانىن انىقتادى.
زەينەتاقى تولەمدەرىن الۋشىلارمەن جاسالعان شارتتاردا كورسەتىلگەن مەديسينالىق قىزمەتتەر ءىس جۇزىندە كورسەتىلمەگەن. قاراجات جەكە كاسىپكەردىڭ ەسەپشوتتارىنا ءتۇسىپ، كەيىن تولەم قۇرالى ارقىلى الۋشىلارعا نەمەسە ولار كورسەتكەن بانكتىك دەرەكتەمەلەر بويىنشا باسقا تۇلعالارعا قايتا اۋدارىلعان.
وسىلايشا، ايەل وسىنداي اۋدارىمداردى جاساعانى ءۇشىن ماتەريالدىق سىياقى العان. زاڭسىز اۋدارىلعان قاراجاتتىڭ جالپى سوماسى 16 ملن تەڭگەدەن اسقان، بۇل قويىلعان ايىپ پەن سوت انىقتاعان ءمان-جايلارعا سايكەس ءىرى مولشەرگە جاتادى.
سوتتالۋشى كىناسىن تولىق مويىندادى. جازا تاعايىنداۋ كەزىندە سوت قىلمىستىق جاۋاپتىلىق پەن جازانى جەڭىلدەتەتىن ءمان-جايلار رەتىندە كىنانى تولىق مويىنداۋدى، جاساعان ارەكەتىنە شىن جۇرەكتەن وكىنۋدى، كامەلەتكە تولماعان بالالارىنىڭ بولۋىن جانە ءوز ەركىمەن كەلىپ مويىنداۋىن ەسكەردى. ءىس بويىنشا اۋىرلاتاتىن ءمان-جايلار انىقتالماعان.
سوتتالۋشىنىڭ جەكە باسىن، ءىس بويىنشا بارلىق ءمان-جايلاردى، سونداي-اق قىلمىستىق كودەكستىڭ 55-بابىنىڭ 2-بولىگىنىڭ تالاپتارىن ەسكەرە وتىرىپ، سوت ايەلگە 2 جىلعا باس بوستاندىعىن شەكتەۋ جازاسىن تاعايىندادى. كامەلەتكە تولماعان بالالارىنىڭ بولۋىنا بايلانىستى جانە قىلمىستىق كودەكستىڭ 74-بابىنىڭ 1-بولىگىنىڭ نەگىزىندە جازانى وتەۋ 5 جىلعا كەيىنگە قالدىرىلدى.
سونداي-اق سوتتالعان ايەلدەن مەملەكەت كىرىسىنە زاڭسىز الىنعان تابىس رەتىندە 16 432 000 تەڭگە ءوندىرىلدى. ۇكىم زاڭدى كۇشىنە ەنگەن جوق.