الماتىدا وتكەن «قازاقستان – جۇڭگو» ينۆەستيسيالىق فورۋمىندا اقمولا وبلىسىنىڭ اكىمى مارات احمەتجانوۆ قىتايلىق ينۆەستورلارمەن ەكى كەلىسىمگە قول قويدى. ءبىرىنشىسى ءۇش جەل ەلەكتر ستانسياسىن سالۋدى، ەكىنشىسى جاقسى اۋدانىنداعى ەلەۆاتوردى جاڭعىرتۋدى كوزدەيدى. اكىمدىكتىڭ دەرەگىنشە، بۇل جوبالارعا سالىناتىن جالپى ينۆەستيسيا كولەمى 506 ملن دوللارعا جەتۋى مۇمكىن، دەپ حابارلايدى infohub.kz سايتى.
SUNGROW Renewable Development Co.، Ltd. كومپانياسى قۋاتى 300، 100 جانە 50 مۆت ستانسيالار سالماق. ولاردىڭ ەڭ ۇلكەنى ەسىل اۋدانىندا، قالعان ەكەۋى زەرەندى اۋدانىندا بوي كوتەرەدى. ءۇش نىساننىڭ جالپى قۋاتى 450 مۆت بولىپ، ولارعا سالىناتىن ينۆەستيسيا 500 ملن دوللارعا دەيىن باعالانىپ وتىر.
جەر تەلىمدەرى راسىمدەلىپ، جوبالىق قۇجاتتاما مەملەكەتتىك ساراپتامادان وتكەن. قۇرىلىس جۇمىستارىن 2026 جىلدىڭ قازانىندا باستاپ، 2028 جىلعا قاراي اياقتاۋ جوسپارلانۋدا. ستانسيالار ىسكە قوسىلعان سوڭ 25-تەن استام تۇراقتى جۇمىس ورنى اشىلادى.
«جاڭا جوبا جاڭارتىلاتىن ەنەرگەتيكا قۋاتىن ارتتىرىپ، جەكە ينۆەستيسيالاردى تارتۋعا جانە جاڭا جۇمىس ورىندارىن اشۋعا مۇمكىندىك بەرەدى. اكىمدىك جوبالاردى بارلىق كەزەڭدە سۇيەمەلدەيتىن بولادى»، — دەدى احمەتجانوۆ.
SUNGROW Renewable Development قىتايلىق Sungrow Power Supply توبىنا كىرەدى، ونىڭ اكسيالارى شەنچجەن بيرجاسىندا ساۋدالانادى. اكىمنىڭ ايتۋىنشا، 2023 جىلى ارشالى اۋدانىندا SUNGROW-مەن بىرلەسىپ جالپى قۋاتى 221 مۆت جاڭارتىلاتىن ەنەرگەتيكا جوبالارى جۇزەگە اسىرىلعان. ولارعا سالىنعان ينۆەستيسيا 100 ملرد تەڭگەدەن اسقان.
سونىمەن قاتار كومپانيا اقتوبە وبلىسىنىڭ حرومتاۋ اۋدانىندا قۋاتى 200 مۆت جەل ستانسياسىن سالۋ تۋرالى كەلىسىم جاسادى. 2025 جىلى جەرگىلىكتى اكىمدىك بۇل جوبانى 171 ملن دوللارعا باعالاپ، ستانسيانى 2027 جىلى ىسكە قوسۋدى جوسپارلاعان.
ەكىنشى جوبا جاقسى اۋدانىنداعى قازاق اۋىلىنداعى ەلەۆاتورعا قاتىستى. قىتايلىق East Hope Group جۇمىس ىستەپ تۇرعان نىساندى ساتىپ الىپ، ونى قايتا جاڭعىرتۋدا. جۇمىستار شامامەن 80%-عا ورىندالىپ، ىسكە قوسۋ 2026 جىلدىڭ قازانىنا جوسپارلانعان.
جاڭعىرتۋدان كەيىن كاسىپورىن بيدايدى قابىلداپ، ساقتاپ، وڭدەي الادى، سونداي-اق جىلىنا 100 مىڭ تونناعا دەيىن جەم ۇنىن شىعارادى. جوباعا 6 ملن دوللار سالىنادى. تولىق قۋاتقا شىققان سوڭ مۇندا 30 تۇراقتى جۇمىس ورنى اشىلادى.
بۇعان دەيىن «كۋرسيۆ» فرانسۋزدىق Total كومپانياسىنىڭ قازاقستاندا قۋاتى 1 گۆت «ميرنىي» الىپ جەل پاركىن ەنەرگيا جيناقتاۋ جۇيەسىمەن بىرگە سالا باستاعانىن جازعان بولاتىن. جالپى ينۆەستيسيا كولەمى 1،1 ملرد دوللاردى قۇرايدى دەپ جوسپارلانۋدا.