قىتايلىق CoolFly ستارتاپى تىك تۇرىپ باسقارىلاتىن ەرەكشە ۇشۋ اپپاراتى Urban-دى تانىستىردى. بۇل — ازىرلەۋشىلەر «اۋە سكەيتبوردى» دەپ اتايتىن ءبىر ورىندى ەلەكترلىك درون. Global Times مالىمەتىنشە، جاڭا قۇرىلعىنى باسقارۋدى شامامەن 10 مينۋتتا مەڭگەرۋگە بولادى، دەپ حابارلايدى infohub.kz.
Urban ادەتتەگى ۇشاقتارعا ۇقسامايدى: ونىڭ قاناتتارى دا، كابيناسى دا جوق. ونىڭ ورنىنا اپپارات ديامەترى شامامەن 3،5 مەتر دوڭگەلەك پلاتفورمامەن جابدىقتالعان، ونىڭ ىشىندە تورمەن قورعالعان ءتورت جەلدەتكىش جاسىرىلعان. پلاتفورمانىڭ ورتاسىندا پيلوتقا ارنالعان ورىن بار.
قۇرىلعى بويى 1،9 مەترگە دەيىن، سالماعى 90 كەلىگە دەيىنگى ادامعا ەسەپتەلگەن. ۇشۋ ءۇشىن پلاتفورماعا تۇرىپ، ۇشۋ تۇيمەسىن باسۋ جەتكىلىكتى، ال باعىت باسقارۋ تۇتقاسى ارقىلى بەرىلەدى. كومپانيا دەرەكتەرى بويىنشا، Urban ساعاتىنا 70 شاقىرىمعا دەيىن جىلدامدىققا جەتە الادى جانە اۋەدە شامامەن 11 مينۋت بولا الادى. اپپاراتتىڭ قۇنى شامامەن 6،3 ميلليون تەڭگەدەن باستالادى.
دروننىڭ باستى ەرەكشەلىگى — باسقارۋ جۇيەسى. پيلوت ۇنەمى دەنە قالپىن وزگەرتكەندىكتەن، اۋىرلىق سەنترى دە وزگەرەدى. اپپارات تەپە-تەڭدىگىن جوعالتپاۋى ءۇشىن داچيكتەر پيلوتتىڭ قالپىن باقىلاپ، جەلدەتكىشتەردىڭ تارتۋ كۇشىن اۆتوماتتى تۇردە تۇزەتەدى. CoolFly مۇنىڭ گيروسكۋتەر پرينسيپىمەن جۇمىس ىستەيتىنىن، سوندىقتان پيلوتقا ۇزاق ۋاقىت وقۋدىڭ قاجەتى جوق — اپپاراتتىڭ قوزعالىسىنا ۇيرەنۋ جەتكىلىكتى ەكەنىن تۇسىندىرەدى.
ازىرلەۋشىلەر قاۋىپسىزدىككە دە كوڭىل بولگەن. Urban رەزەرۆتىك باسقارۋ جۇيەسىمەن، پاراشيۋتپەن، قاۋىپسىزدىك جاستىقتارىمەن جانە جەلدەتكىشتەردىڭ اينالاسىنداعى قورعانىس ەلەمەنتتەرىمەن جابدىقتالعان. ليدار (جارىق يمپۋلستارى ارقىلى وبەكتىلەرگە دەيىنگى قاشىقتىقتى ولشەيتىن تەحنولوگيا) مەن كامەرالار اعاشتار مەن ەلەكتر جەلىلەرى سياقتى كەدەرگىلەردى انىقتاۋعا كومەكتەسەدى.
كومپانيا Urban-دى ەكسترەمالدى جاعدايدا سىناقتان وتكىزگەن: 2026 جىلدىڭ اقپانىندا حاربيندەگى ءىس-شارالار كەزىندە ەكى اپپارات ارتىستەردى اۋەگە كوتەرگەن. ۇشۋلار شامامەن -30 گرادۋس تەمپەراتۋرادا جانە قاتتى قار جاۋعان كەزدە وتكەن.
ءقازىر CoolFly ديلەرلەرمەن كەلىسىم جاساپ، قىتايداعى تۋريستىك الاڭدارمەن جانە ۇشۋ لاگەرلەرىمەن ىنتىماقتاسىپ جاتىر. شەتەلدە Urban-دى جەكە ۇشۋ اپپاراتى رەتىندە ساتۋ جوسپارلانۋدا.