اقمولا وبلىسىندا Zijin RG Gold كومپانياسىنىڭ جاڭا التىن ءوندىرۋ فابريكاسىنىڭ قۇرىلىسى باستالدى. جوباعا سالىناتىن ينۆەستيسيا كولەمى $600 ملن استام بولادى، دەپ حابارلايدى infohub.kz سايتى.
وبلىس اكىمدىگىنىڭ مالىمەتىنشە، كاسىپورىن رايگورودوك كەن ورنىندا سالىنۋدا. جاڭا فابريكانىڭ جوبالىق قۋاتى جىلىنا 10 ملن تونناعا دەيىن رۋدانى قۇرايدى. نىسان پايدالانۋعا بەرىلگەننەن كەيىن كەشەننىڭ جالپى قۋاتى جىلىنا 16 ملن توننا رۋداعا دەيىن ارتادى، ال دورە قورىتپاسىنىڭ ءوندىرىسى جىلىنا 6 توننادان 12 توننادان استامعا دەيىن ۇلعايادى. سونىمەن قاتار، كاسىپورىن جىلىنا شامامەن 7 توننا التىن وندىرە الادى.
تەك فابريكانىڭ ءوزى عانا ەمەس، جوبا اياسىندا ەنەرگيامەن جابدىقتاۋ، سۋمەن قامتاماسىز ەتۋ نىساندارى، قالدىق قويماسى، كولىك ينفراقۇرىلىمى، جوندەۋ-قويما كەشەندەرى جانە 400 ادامعا ارنالعان ۆاحتالىق قالاشىق سالۋ كوزدەلگەن.
Zijin Mining كومپانياسى ايماق جاستارىنا ارنالعان ستيپەنديالىق باعدارلامانى ىسكە قوستى. ستۋدەنتتەر قىتايدا ءبىلىم الىپ، ورالعان سوڭ كەنىشتە جانە جاڭا زاۋىتتا جۇمىس ىستەۋ مۇمكىندىگىنە يە بولادى. سونداي-اق، اقمولا وبلىسىنىڭ جوعارى وقۋ ورىندارى مەن كوللەدجدەرىمەن ىنتىماقتاستىق جوسپارلانۋدا.
«ءبىزدىڭ ايماق ءۇشىن وسىنداي دەڭگەيدەگى ينۆەستوردىڭ كەلۋى – اۋقىمدى وقيعا. بۇل ەكولوگيالىق جاۋاپكەرشىلىگى جوعارى، بۇكىل سالانىڭ دامۋىنىڭ جاڭا، جوعارى تەحنولوگيالىق كەزەڭىنە كوشۋ»، – دەپ اتاپ ءوتتى اقمولا وبلىسىنىڭ اكىمى مارات احمەتجانوۆ.
اقمولا وبلىسى بۇگىندە دورە قورىتپاسىنىڭ رەسپۋبليكالىق ءوندىرىس كولەمىنىڭ 54%-ىن قامتاماسىز ەتەدى. سونىمەن قاتار، Altyntau Kokshetau كاسىپورنى ءوندىرىس الاڭىن كەڭەيتىپ، جەراستى ءوندىرىسىن باستاۋدا. «التىنالماس» جولىمبەت جانە اقسۋ كەنىشتەرىندەگى التىن ءوندىرۋ فابريكالارىن جاڭعىرتۋدا. بۇل جۇمىستاردىڭ قۇنى 23 ملرد تەڭگەنى قۇرايدى.
ايماق بيلىگى ءىرى جوبالاردىڭ جۇزەگە اسىرىلۋى 2028 جىلعا قاراي التىندى قايتا وڭدەۋ كولەمىن جىلىنا 50 ملن توننا رۋداعا دەيىن ارتتىرۋعا مۇمكىندىك بەرەدى دەپ كۇتەدى.