جۇڭگو بيلىگى ادام تاماقتانۋىنا ارنالعان ورامجاپىراقتىڭ بالعىندىعىن ساقتاۋ ءۇشىن فورمالدەگيد قولدانىلعانى تۋرالى اقپاراتتى تەكسەرۋدى باستادى، دەپ حابارلايدى infohub.kz سايتى.
سولتۇستىك-شىعىستاعى حەبەي پروۆينسياسىنىڭ رەسمي وكىلدەرى ورامجاپىراقتاردى تيەۋ الدىندا ەرىتىندىگە باتىرىپ جاتقان ادامداردى كورسەتەتىن بەينەجازبانىڭ راستىعىن راستادى. بەينەجازبانى وتكەن اپتادا ەكولوگيالىق بلوگەر جاريالاعان. قىتايدا تاعامنىڭ بالعىندىعىن ساقتاۋ ءۇشىن قاتەرلى ىسىك تۋدىراتىنى بەلگىلى ءتۇسسىز حيميالىق زات — فورمالدەگيدتى قولدانۋ قاتاڭ تىيىم سالىنعان.
جۇڭگو — الەمدەگى ەڭ ءىرى ورامجاپىراق ءوندىرۋشى، ونىڭ كوپ بولىگى ازياداعى كورشى ەلدەرگە ەكسپورتتالادى. مەملەكەتتىك ب ا ق مالىمەتىنشە، پوليسيا اتالعان وقيعاعا قاتىسى بار ادامدارعا قاتىستى زاڭدىق شارالار قولدانعان. ءقازىر شەنەۋنىكتەر ەل بويىنشا نارىقتاردا كەنەتتەن تەكسەرۋلەر جۇرگىزىپ، تۇرعىنداردىڭ الاڭداۋشىلىعىن باسۋعا جانە سەنىمدى قالپىنا كەلتىرۋگە تىرىسۋدا.
قىتايدىڭ مەملەكەتتىك باق-ى تەرگەۋشىلەر بۇل ءادىستىڭ قانشالىقتى تارالعانىن انىقتاپ، زارداپ شەككەن كوكونىستەردىڭ تارالۋىن قاداعالاۋ شارالارىن قابىلدايتىنىن حابارلادى. سەنبىدە جاريالانعان مالىمدەمەدە كانباو وكرۋگىنىڭ جەرگىلىكتى بيلىگى: «كەز كەلگەن زاڭسىز نەمەسە تالاپقا ساي ەمەس ارەكەتتەر زاڭعا سايكەس قاتاڭ جازالانادى، بۇل كوكونىس جەتكىزۋ قاۋىپسىزدىگىن قامتاماسىز ەتەدى»، — دەدى.
استاناداعى جاڭا پىسكەن ونىمدەردىڭ نەگىزگى كوزدەرىنىڭ ءبىرى بولىپ تابىلاتىن بەيجىڭدەگى سينفادي نارىعى ءوز ورامجاپىراقتارىنىڭ شىعۋ تەگىن تەكسەرگەنىن جانە زارداپ شەككەن كوكونىستەردىڭ نارىققا تۇسپەگەنىن حابارلادى. بۇل وقيعا جۇڭگو باق-ىندا كەڭىنەن جاريالانۋدا.
«حالىق كۇندەلىگى» گازەتىنىڭ رەداكسيالىق ماقالاسىندا: «كوتەرمە ساتۋشىلار تەك وزدەرىنىڭ قىسقا مەرزىمدى ەكونوميكالىق مۇددەلەرىنە نازار اۋدارىپ، تۇتىنۋشىلاردىڭ ءومىرى مەن دەنساۋلىعىن مۇلدەم ەلەمەدى. ولار زاڭدىق شەكتەن ءوتىپ، مورالدىق تۇرعىدان تۇبىنە جەتتى»، — دەپ جازىلعان.
جۇڭگو جىل سايىن 30 ميلليون توننادان استام ورامجاپىراق وندىرەدى، بۇل الەمدىك جىلدىق كولەمنىڭ جارتىسىنا جۋىعىن قۇرايدى. ۆەتنام، وڭتۇستىك كورەيا جانە رەسەي — بۇل كوكونىستىڭ ەڭ ءىرى ەكسپورتتىق باعىتتارىنىڭ قاتارىندا. امەريكاندىق قاتەرلى ىسىك قوعامىنىڭ مالىمەتىنشە، كەيبىر جۇمىس ورىندارىندا فورمالدەگيدتىڭ جوعارى مولشەرىنە ۇشىراۋ ادامداردا قاتەرلى ىسىكتىڭ كەيبىر تۇرلەرىمەن بايلانىستى، ءبىراق از مولشەردەگى اسەردىڭ سالدارى ازىراق بەلگىلى.