الماتى وبلىسىنداعى «شەلەك-1» جەل ەلەكتر ستانسياسىن باسقاراتىن «ەنەرگيا سەميرەچيا» كومپانياسى ىسكە قوسىلعاننان بەرى العاش رەت تازا پايداعا شىقتى. 2025 جىلدىڭ قورىتىندىسى بويىنشا تابىس 2،22 ملرد تەڭگەنى قۇرادى، ال ءبىر جىل بۇرىن كومپانيا 3،28 ملرد تەڭگە شىعىنعا ۇشىراعان ەدى، دەپ حابارلايدى infohub.kz سايتى.
اۋديتتەن وتكەن قارجىلىق ەسەپتىلىككە سايكەس، كاسىپورىننىڭ ءتۇسىمى 2024 جىلعى 6،28 ملرد تەڭگەمەن سالىستىرعاندا 6،43 ملرد تەڭگەگە دەيىن ءوستى. جالپى پايدا 3،87 ملرد تەڭگەدەن 4،09 ملرد تەڭگەگە ۇلعايدى.
قارجىلىق كورسەتكىشتەردىڭ جاقسارۋىنا باستى فاكتور – وڭ باعامدىق ايىرما بولدى. 2024 جىلى كومپانيا ۆاليۋتالىق قايتا باعالاۋدان 4،09 ملرد تەڭگە شىعىن كەلتىرسە، 2025 جىلى بۇل باپ 1،05 ملرد تەڭگە تابىس اكەلدى.
سالىق سالىنعانعا دەيىنگى پايدا 2،55 ملرد تەڭگەگە جەتتى، ال ءبىر جىل بۇرىن 3،28 ملرد تەڭگە شىعىن بولعان ەدى. كورپوراتيۆتىك تابىس سالىعىن تولەگەننەن كەيىن تازا پايدا 2،22 ملرد تەڭگەنى قۇرادى.
كاسىپورىننىڭ قارجىلىق شىعىندارى ايتارلىقتاي بولىپ قالۋدا، دەگەنمەن تومەندەدى: 2025 جىلى ولار 1،97 ملرد تەڭگەنى قۇرادى، ال وتكەن جىلى 2،05 ملرد تەڭگە بولعان.
بۇعان دەيىن 2024 جىلدىڭ قورىتىندىسى بويىنشا «ەنەرگيا سەميرەچيا» 3،28 ملرد تەڭگە شىعىنعا ۇشىراعانى حابارلانعان بولاتىن. جەل ەلەكتر ستانسياسى ىسكە قوسىلعاننان كەيىنگى ءۇش جىل بويى كومپانيا نەگىزىنەن باعامدىق ايىرمالارعا بايلانىستى شىعىندى بولىپ كەلدى.
2025 جىلدىڭ سوڭىنا قاراي كومپانيا اكسيالارىنىڭ 75% قىتايدىڭ Power Construction Corporation of China Limited كومپانياسىنىڭ ەكى ەنشىلەس قۇرىلىمىنا تيەسىلى. قالعان 25% «سامۇرىق-ەنەرگو» قۇرامىنا كىرەتىن Qazaq Green Power PLC باقىلايدى.
قۋاتى 60 مۆت «شەلەك-1» جەل ەلەكتر ستانسياسى الماتى وبلىسىنىڭ ەڭبەكشىقازاق اۋدانىندا ورنالاسقان. قۇنى 37،4 ملرد تەڭگەنى قۇرايتىن جوباعا ءارقايسىسىنىڭ قۋاتى 2،5 مۆت بولاتىن 24 جەل قوندىرعىسى كىرەدى.