سەۋلدىڭ سولتۇستىك وكرۋگتىك سوتى ۋنيۆەرسيتەت زەرتحاناسىنداعى جەتى ارىپتەسىنىڭ بەت-بەينەسىن پايدالانىپ، 1100-دەن استام پورنوگرافيالىق ديپفەيك جاساعان 30 جاستاعى قىتايلىق اسپيرانتقا قاتىستى ايىپتاۋ ۇكىمىن شىعاردى، دەپ حابارلايدى infohub.kz سايتى.
جاس جىگىت 1،5 جىلعا باس بوستاندىعىنان ايىرىلدى. ناقتى مەرزىمنەن بولەك، سوت ونى جىنىستىق قىلمىس جاساعان ادامدارعا ارنالعان 40 ساعاتتىق باعدارلامادان وتۋگە مىندەتتەپ، بەس جىل بويى بالالار مەن مۇگەدەكتىگى بار ادامدارعا ارنالعان مەكەمەلەردە جۇمىس ىستەۋگە تىيىم سالدى.
تەرگەۋ انىقتاعانداي، قىلمىسكەر وتكەن جىلدىڭ قاراشا ايىنان باستاپ نەيروجەلىلەردىڭ كومەگىمەن كۋرستاستارىنىڭ بەت-بەينەسىن اشىق سۋرەتتەر مەن بەينەجازبالارمەن بىرىكتىرگەن. سونىمەن قاتار، ول Grok چات-بوتىنىڭ قورعانىس شەكتەۋلەرىن اينالىپ ءوتۋ جولدارىن ىزدەگەن.
قىلمىس ساۋىردە اشىلدى: زارداپ شەككەندەردىڭ ءبىرى كۋرستاسىنىڭ كومپيۋتەرىنەن ءوز بەت-بەينەسى بار سۋرەتتەردى كەزدەيسوق بايقاپ قالعان.
سوت پروسەسى بارىسىندا ايىپتالۋشى كىناسىن مويىنداپ، وكىنىش ءبىلدىرىپ، سوتتىڭ دەپوزيتتىك شوتىنا جەتى جابىرلەنۋشىنىڭ ءارقايسىسىنا 7 ميلليون ۆون كولەمىندە وتەماقى سالدى، الايدا ايەلدەر بۇل اقشانى قابىلداۋدان باس تارتتى.
سوت كىنانى مويىنداۋدى جانە ماتەريالداردىڭ ينتەرنەتتە تاراتىلماعانىن ەسكەردى، ءبىراق قىلمىستىڭ اۋىرلىعى مەن جۇيەلى سيپاتى ناقتى باس بوستاندىعىنان ايىرۋدى تالاپ ەتكەنىن اتاپ ءوتتى.