قازاقستان مەن جۇڭگو سۋ شارۋاشىلىعى سالاسىندا جاڭا ءبىلىم بەرۋ جوباسىن باستادى. جوبا بىلىكتى كادرلار دايارلاۋعا باعىتتالعان. تاراپتار تارازدا بىرلەسكەن وقۋ ورتالىعى مەن كوللەدج اشۋ مۇمكىندىگىن تالقىلاۋدا. مۇندا بولاشاق ماماندار زاماناۋي باعدارلامالار بويىنشا جۇڭگو وقىتۋشىلارىنىڭ قاتىسۋىمەن وقيتىن بولادى. جوبا كادر دايارلاۋدىڭ تولىق سيكلىن قالىپتاستىرىپ، قازاقستاندىق مامانداردىڭ كاسىبي ءبىلىم الۋ مۇمكىندىكتەرىن كەڭەيتەدى دەپ كۇتىلۋدە، دەپ حابارلايدى infohub.kz.
بىرلەسكەن باستامانى ىسكە اسىرۋ پەرسپەكتيۆالارىن قازاقستاننىڭ سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ پەن جۇڭگو دەلەگاسياسى «ءۇش شاتقال» ەلەكترەنەرگەتيكالىق كاسىپتىك كوللەدجىنىڭ رەكتورى چەن مينمەن بىرگە تالقىلادى. «كەلىسسوزدەردىڭ نەگىزگى تاقىرىبى سۋ شارۋاشىلىعى سالاسىنا ماماندار دايارلاۋ جانە ولاردىڭ بىلىكتىلىگىن ارتتىرۋ سالاسىنداعى ەكىجاقتى ىنتىماقتاستىقتى دامىتۋ بولدى»، – دەپ حابارلادى رەسپۋبليكانىڭ سۋ رەسۋرستارى جانە يرريگاسيا مينيسترلىگى.
كەزدەسۋ بارىسىندا تاراپتار تارازدا قازاق سۋ شارۋاشىلىعى عىلىمي-زەرتتەۋ ينستيتۋتىنىڭ بازاسىندا بىرلەسكەن وقۋ ورتالىعىن اشۋ مۇمكىندىگىن قاراستىردى. سونىمەن قاتار، قازاق سۋ شارۋاشىلىعى جانە يرريگاسيا ۇلتتىق ۋنيۆەرسيتەتىنىڭ بازاسىندا بىرلەسكەن وقۋ كوللەدجىن قۇرۋ ماسەلەسى تالقىلاندى. «بۇل ءبىلىم بەرۋ الاڭدارى سۋ سالاسىنا بىلىكتى مامانداردى تولىق سيكلمەن دايارلاۋدى قامتاماسىز ەتەدى دەپ كۇتىلۋدە. وقۋ ۇدەرىسىنە، اتاپ ايتقاندا، وسى سالادا كادر دايارلاۋدا ۇلكەن تاجىريبەسى بار جۇڭگو وقىتۋشىلارىن تارتۋ جوسپارلانۋدا»، – دەپ اتاپ ءوتتى ۆەدومستۆودا.
كەزدەسۋگە قاتىسۋشىلار جۇمىس ىستەپ جۇرگەن قازاقستاندىق مامانداردىڭ بىلىكتىلىگىن ارتتىرۋ ماسەلەسىنە ەرەكشە نازار اۋداردى. اتاپ ايتقاندا، قازاقستاننىڭ سۋ شارۋاشىلىعى وكىلدەرى ءۇشىن قىتايدا ارنايى وقۋ باعدارلامالارى مەن تاعىلىمدامالار ازىرلەۋ مۇمكىندىگى تالقىلاندى. كەلىسسوز قورىتىندىسى بويىنشا تاراپتار بارلىق باستامالاردى ەگجەي-تەگجەيلى پىسىقتاۋ جانە ولاردى ءىس جۇزىندە ىسكە اسىرۋ بويىنشا ۇسىنىستار دايىنداۋ ءۇشىن بىرلەسكەن جۇمىس توبىن قۇرۋعا كەلىستى.
سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ: «„ءۇش شاتقال“ كوللەدجى قىتايدىڭ سۋ شارۋاشىلىعى سالاسىنا كادر دايارلاۋدا كوشباسشىلاردىڭ ءبىرى ەكەنىن ەسكەرە وتىرىپ، وسى باعىتتاعى ىنتىماقتاستىقتى دامىتۋ ۇلكەن الەۋەتكە يە دەپ سانايمىز. تاراز قالاسىندا وقۋ ورتالىعى مەن وقۋ كوللەدجىن اشۋ جونىندەگى بىرلەسكەن جوبالار اكادەميالىق الماسۋدى، بىلىكتىلىكتى ارتتىرۋ باعدارلامالارىن، عىلىمي تاعىلىمدامالاردى جانە قازاقستاندىق مامانداردى وقىتۋدى قوسا العاندا، كادر دايارلاۋ سالاسىنا ۇلكەن سەرپىن بەرەدى دەپ سەنەمىن»، – دەدى.
مينيسترلىك بىرلەسكەن ءبىلىم بەرۋ جوبالارىن ىسكە اسىرۋ قازاقستاننىڭ سۋ شارۋاشىلىعى سالاسىنىڭ كادرلىق الەۋەتىن نىعايتۋعا، حالىقارالىق ىنتىماقتاستىقتى كەڭەيتۋگە جانە ماماندار دايارلاۋدىڭ وزىق تاسىلدەرىن ەنگىزۋگە مۇمكىندىك بەرەدى دەپ ەسەپتەيدى. وقۋ ورتالىعى مەن كوللەدجدىڭ قۇرىلۋى كاسىپتىك ءبىلىم بەرۋدى دامىتۋداعى ماڭىزدى قادام بولادى جانە ەلدىڭ سۋ شارۋاشىلىعى جۇيەسىن جاڭعىرتۋ جاعدايىندا سۇرانىسقا يە بىلىكتى كادرلارمەن سالانى قامتاماسىز ەتۋگە كومەكتەسەدى.