ءبىر جەردە كوپ وتىرساڭ جالعىز ءوزىڭ،
كورمەسە كوڭىل اشار جاندى كوزىڭ.
كەيدە اششى، كەيدە ءتاتتى قيال بيلەپ.
كەتەتىن بار ەمەس پە ءبىر مىنەزىڭ؟
سەندە بار ونداي مىنەز مەندە جوق پا؟
سارعايعان دەرتسىز اۋرۋ ەلدە جوق پا؟
قۇس - تورعا، بالىق - اۋعا، باتىر - جاۋعا،
جەلىككەن جەلدى اياققا كەرمە جوق پا؟
قاسىندا جۇيرىك قيال سوندا سەرىك،
باسىندا اسىرەسە بولماسا ەرىك.
قاۋلاعان قالىڭ ءۇمىت كوزگە ەلەستەپ،
بىرەسە اۋىر قايعى قاپتار كەلىپ.
ەركىمەن دۋلىعاسىن ەرلەر تاستاپ،
ءبىر جۋان بايتەرەككە كەلسە باستاپ.
باي جومارت، بايبىشە دە ساراڭ ەمەس،
بولىپتى سىي كورسەتپەك، قوينىن اشپاق.
تەڭگەگە تەلمىرەتىن ەرىنشەكتەر
تۇسپەگەن جەلەكتەرى كەلىنشەكتەر.
قايىرماي قايىن اتاسىن، «ۇيالام» دەپ،
بەت باسىپ، سىرت اينالىپ، شەگىنشەكتەر.
كەڭ ولكە كەلبەت كەتىپ مۇنار باسقان،
ءبىر شاقتا سەرى جاستار قۇمارلاسقان.
كوتەرىپ وكشەلەرىن مومىن جاندار،
قوش ايتقان، قول الىسقان قيا الماستان.
تاعى دا كوز الدىمدا ءبىر جيىن-توي،
ءۇي تىككەن، وشاق قازعان، سويىلعان قوي.
ات شاپقان، پالۋان تۇسكەن، سەركە تارتقان.
شاتتانعان، كۇلىمدەسكەن، تولقىعان وي.
بۇل توپتا ءبىلىمسىز دە، بىلگەن دە كوپ،
جان بولىپ جاراتىلىپ جۇرگەن دە كوپ،
كوزىنەن جاس اعىزىپ جىلاعانمەن،
سەمىرىپ قارا سۋعا كۇلگەن دە كوپ.
مەنداعى جىلاعاننىڭ ءبىرى ەكەنمىن،
قايعىرىپ سولاردى ويلاپ ءجۇر ەكەنمىن..
اياماي قانى بىرگە قاستىق قىلىپ،
شىعا الماي ءبىر تۇيىقتا تۇر ەكەنمىن.
سۇيىسكەن، ءسوز بەرىسكەن زامانداستان
قانشاسى حال بىلىسكەن، امانداسقان؟
سىرت بەرگەن، قول سىلتەگەن، كوبى ۇمىتقان،
مەن مىسكىن بۇلاردى ويلاپ قيال باسقان.

---