قىزىلوردا وبلىسىندا دەربەس دەرەكتەر جاپپاي تاراپ كەتتى: شيەلى اۋدانىنداعى جەتى ءبىلىم بەرۋ مەكەمەسىنىڭ باسشىلارى مەملەكەتتىك ساتىپ الۋ پورتالىنا 529 قىزمەتكەرىنىڭ قۇپيا مالىمەتتەرىن جاريالاپ قويعان، دەپ حابارلايدى infohub.kz سايتى.
قىزىلوردا وبلىسىنىڭ پروكۋراتۋراسى ءمالىم ەتكەندەي، بارلىق قۇپيا اقپارات مەملەكەتتىك ساتىپ الۋ پورتالىنداعى اشىق قۇجاتتارعا جاي عانا تىركەلىپ قويىلعان. بۇزۋشىلىقتى پروكۋرورلار بايقاپ، جاعدايعا ارالاسقان.
«اتالعان بۇزۋشىلىقتار جەتى ءبىلىم بەرۋ ۇيىمىندا انىقتالىپ، سالدارىنان 529 قىزمەتكەردىڭ ەڭبەك قۇقىقتارى بۇزىلدى. پروكۋرورلىق قاداعالاۋ اكتىسىنىڭ نەگىزىندە دەربەس دەرەكتەردى قامتيتىن مالىمەتتەردى مەملەكەتتىك ساتىپ الۋ پورتالىنان ءوشىرۋ بويىنشا ءتيىستى شارالار قابىلداندى»، – دەلىنگەن حابارلامادا.
سونىمەن قاتار دەربەس دەرەكتەردى زاڭسىز جاريالاۋعا جول بەرگەن ءبىلىم بەرۋ ۇيىمدارىنىڭ باسشىلارى تارتىپتىك جاۋاپكەرشىلىككە تارتىلدى.
پروكۋراتۋرا قازاقستان رەسپۋبليكاسى زاڭناماسىنىڭ تالاپتارىن ساقتاۋدى باقىلاۋدا ۇستايتىنىن اتاپ ءوتتى.
بۇعان دەيىن «كۋرسيۆ» قازاقستاننىڭ ىشكى ىستەر مينيسترلىگى ۇلتتىق قاۋىپسىزدىك كوميتەتىمەن، باس پروكۋراتۋرامەن جانە چەحيا پوليسياسىمەن بىرلەسىپ، قازاقستاندىقتار مەن تمد ازاماتتارىنىڭ دەربەس دەرەكتەرىن زاڭسىز ساتقان حالىقارالىق جەلىنى جويعانىن جازعان. بىرلەسكەن ءتىنتۋ بارىسىندا جابىق ينتەرنەت-رەسۋرس ارقىلى ارەكەت ەتكەن قىلمىستىق سحەمانىڭ ۇيىمداستىرۋشىلارى ۇستالدى.
ودان بۇرىن ۇلتتىق قاۋىپسىزدىك كوميتەتى ميكروقارجى ۇيىمدارى مەن كوللەكتورلارعا قازاقستاندىقتاردىڭ جەكە دەرەكتەرىن ساتقان توپتى ۇستاعانى حابارلانعان.