قىزىلوردادا 21 جاستاعى جۇرگىزۋشى جول ءجۇرۋ ەرەجەلەرىن بىرنەشە رەت بۇزعانى ءۇشىن كولىك باسقارۋ قۇقىعىنان جەتى جىلعا ايىرىلىپ، 15 تاۋلىككە اكىمشىلىك قاماۋعا الىندى. بۇل تۋرالى infohub.kz سايتى حابارلايدى.
NUR.KZ پورتالىنىڭ Polisia.kz-كە سىلتەمە جاساپ حابارلاۋىنشا، بەينەباقىلاۋ كامەرالارى جول ءجۇرۋ ەرەجەلەرىنىڭ بىرنەشە بۇزىلعانىن تىركەگەن سوڭ، پوليسيا دەرەۋ شارا قولداندى. بۇزۋشى انىقتالىپ، پوليسيا باسقارماسىنا جەتكىزىلدى.
ىشكى ىستەر مينيسترلىگىنىڭ اقپاراتتىق مەدياپورتالىنىڭ دەرەگىنشە، تەكسەرۋ بارىسىندا ەر ادامنىڭ كولىكتى ماس كۇيىندە باسقارعانى انىقتالدى. ول قىزىلوردا قالاسىنىڭ 21 جاستاعى تۇرعىنى نۇرسۇلتان ايتبايەۆ بولىپ شىقتى.
سونىمەن قاتار جۇرگىزۋشىگە قاتىستى مانەۆر جاساۋ ەرەجەلەرىن بۇزعانى، تەحنيكالىق بايقاۋدان وتپەي كولىك باسقارعانى، اپاتتىق جاعداي تۋعىزعانى، سونداي-اق باعدارشامنىڭ قىزىل تىيىم سالاتىن بەلگىسىنەن وتكەنى ءۇشىن اكىمشىلىك حاتتامالار تولتىرىلدى.
سوت شەشىمىمەن قۇقىق بۇزۋشى 15 تاۋلىككە اكىمشىلىك قاماۋعا الىنىپ، كولىك باسقارۋ قۇقىعىنان جەتى جىلعا ايىرىلدى. اۆتوموبيل ايىپپۇل تۇراعىنا قويىلدى.
«پوليسيا بارلىق جول قوزعالىسىنا قاتىسۋشىلاردى جولداعى قاۋىپسىزدىك تالاپتارىن قاتاڭ ساقتاۋعا جانە وزگە ازاماتتاردىڭ ءومىرى مەن دەنساۋلىعىنا ءقاۋىپ توندىرەتىن ارەكەتتەرگە جول بەرمەۋگە شاقىرادى»، — دەپ قوستى پوليسيادا.
بۇعان دەيىن جەزقازعاندا پوليسيا تالاپتارىنا باعىنباعان جانە كولىكتى ماس كۇيىندە باسقارعان جۇرگىزۋشىنىڭ 35 تاۋلىككە قامالعانى حابارلانعان بولاتىن.