شىعىس قازاقستان وبلىسىنداعى تانىمال «راحمان قاينارى» كۋرورتىنا اپاراتىن جولدىڭ جوندەلۋىنە نارازى تۋريستەر جول جۇمىسشىلارىن بالاعاتتاپ، ولارمەن توبەلەسە باستاعان. «قازاۆتوجول» ۇلتتىق كومپانياسى دەمالىسقا شىققانداردى تارتىپسىزدىكتى توقتاتىپ، قىزمەتكەرلەردىڭ تالاپتارىن قۇرمەتپەن قابىلداۋعا شاقىردى، دەپ حابارلايدى infohub.kz.
وسكەمەن – التاي – ۇلكەن نارىن – كاتونقاراعاي – راحمان قاينارى اۆتوموبيل جولىنىڭ ۋچاسكەسىندە اۋقىمدى جول-قۇرىلىس جۇمىستارى جالعاسۋدا. اسفالت توسەۋگە بايلانىستى مۇندا تاڭعى التىدان كەشكى التىعا دەيىن ۋاقىتشا قوزعالىس شەكتەۋى ەنگىزىلگەن. جولدىڭ جابىلۋى تۋريستەردىڭ كۋرورتقا بارۋىنا كەدەرگى كەلتىرەدى: ولار ۇزىن كەزەككە تۇرىپ، دەمالىس ايماعىنا جەتۋ نەمەسە شىعۋ ءۇشىن «ۋاقىتشا تەرەزەنى» كۇتۋگە ءماجبۇر.
جاعدايدى جەڭىلدەتۋ ءۇشىن ساعات 12:00-دەن 13:00-گە دەيىن قوسىمشا كولىك وتكىزۋ ۇيىمداستىرىلدى. الايدا سوڭعى كۇندەرى جۇمىس ورنىندا جەكەلەگەن دەمالىسۋشىلار تاراپىنان اگرەسسيالىق مىنەز-ق ۇلىق جيىلەگەن. «بالاعاتتاۋ، قورقىتۋ، جول تەحنيكاسىنىڭ جۇمىسىنا كەدەرگى كەلتىرۋ، سونداي-اق قوزعالىس قاۋىپسىزدىگىن قامتاماسىز ەتەتىن قىزمەتكەرلەرگە قاتىستى كۇش قولدانۋ فاكتىلەرى تىركەلدى»، — دەپ مالىمدەدى ۇلتتىق كومپانيادا.
«قازاۆتوجول» مۇنداي ارەكەتتەرگە جول بەرىلمەيتىنىن اتاپ ءوتتى، ويتكەنى جۇمىسشىلار ءوز جۇمىسىن قيىن جاعدايدا اتقارىپ جاتىر، ال ءاربىر جانجال مەن ۋاقىت رەجيمىن ساقتاماۋ جوندەۋ جۇمىستارىنىڭ اياقتالۋ مەرزىمىنە تىكەلەي اسەر ەتەدى. سونىمەن قاتار، ۇلتتىق كومپانيا زورلىق-زومبىلىق، قورقىتۋ، بالاعاتتاۋ جانە قىزمەتكەرلەردىڭ زاڭدى قىزمەتىنە كەدەرگى كەلتىرۋ قازاقستان زاڭناماسى بويىنشا جاۋاپكەرشىلىككە اكەپ سوعاتىنىن ەسكە سالدى.