جاڭا جاھاندىق ەسەپكە سايكەس، 2050 جىلعا قاراي الەمدە قاتەرلى ىسىكتىڭ جاڭا جاعدايلارى 67%-عا ءوسىپ، جىلىنا 34 ميلليونعا جەتۋى مۇمكىن، دەپ حابارلايدى infohub.kz.
امەريكاندىق ونكولوگيا قوعامى (ACS) حالىقارالىق قاتەرلى ىسىكتى زەرتتەۋ اگەنتتىگىمەن (IARC) بىرلەسىپ، «CA: A Cancer Journal for Clinicians» جۋرنالىندا جاريالانعان «Global Cancer Statistics، 2026» ەسەبىن ۇسىندى. باعالاۋلار 2024 جىلعى GLOBOCAN دەرەكتەرىنە نەگىزدەلگەن، وعان سايكەس الەمدە شامامەن 21 ميلليون جاڭا ونكولوگيالىق اۋرۋ جاعدايى جانە 9،8 ميلليون ءولىم تىركەلگەن. زەرتتەۋشىلەردىڭ ەسەپتەۋىنشە، پلانەتاداعى ءاربىر بەسىنشى ادام ومىرىندە قاتەرلى ىسىكپەن كەزدەسەدى.
عالىمداردىڭ بولجامى بويىنشا، 2050 جىلعا قاراي جىل سايىنعى دياگنوزدار سانى 67%-عا ارتىپ، تەك دەموگرافيالىق فاكتورلار — حالىق سانىنىڭ ءوسۋى مەن قارتايۋى ەسەبىنەن 34 ميلليونعا جەتەدى. سونىمەن قاتار، ساراپشىلار ونكولوگيادان بولاتىن ءولىمنىڭ جارتىسىنا جۋىعىن ءقاۋىپ فاكتورلارىن باقىلاۋ، ەرتە دياگنوستيكا جانە ۋاقتىلى ەمدەۋ ارقىلى الدىن الۋعا بولاتىنىن اتاپ وتەدى.
ەڭ كوپ تارالعان جانە ەڭ ءقاۋىپتى ءتۇرى — وكپە وبىسى: 2024 جىلى 2،6 ميلليون جاعداي (بارلىق دياگنوزداردىڭ 13%) جانە 1،9 ميلليون ءولىم (ءولىمنىڭ 19%) انىقتالدى. ەكىنشى ورىندا — ايەلدەردەگى ءسۇت بەزى وبىسى (2،4 ميلليون جاعداي جانە 694 مىڭ ءولىم). ودان كەيىن تىك ىشەك وبىسى (2 ميلليوننان استام جاعداي)، ەرلەردەگى قۋىق استى بەزىنىڭ وبىسى (1،5 ميلليون) جانە اسقازان وبىسى (980 مىڭ) تۇر.
ACSء-تىڭ اعا عىلىمي قىزمەتكەرى حەنا سۋن مەن ۆيسە-پرەزيدەنت احمەدين دجەمال بارلىق ەلدەر ءۇشىن باسىمدىق تەمەكى شەگۋمەن، ينفەكسيالارمەن، الكوگولمەن كۇرەس، سونداي-اق سالاۋاتتى سالماق پەن بەلسەندىلىكتى قولداۋ بولۋى كەرەك ەكەنىن اتاپ وتەدى.