قازاقستاننىڭ بەلگىلى كاسىپكەرى كەڭەس راكيشەۆكە قاتىستى كومپانيا باتىس قازاقستان وبلىسىنداعى مۇناي-گاز اكتيۆتەرىن ساتىپ الۋدا. مامىلە سوماسى $304،6 ملن قۇرايدى، دەپ حابارلايدى infohub.kz سايتى.
بريتاندىق Nostrum Oil & Gas كومپانياسىنىڭ ەنشىلەس قۇرىلىمى «جايىقمۇناي» ج ش س جانە «پوزيتيۆ ينۆەست» جشس-دەگى ۇلەستەرىن ساتۋ تۋرالى كەلىسىمگە قول قويدى. ساتىپ الۋشى رەتىندە Altaris Holding Ltd. شىعادى، ونىڭ قۇرىلتايشىلارىنىڭ قاتارىندا Fincraft Group كومپانياسىنىڭ قۇرامىنا كىرەتىن Fincraft Energy Holding Limited بار.
مامىلەنىڭ تۇپكىلىكتى سوماسى تازا قارىز، اينالىم كاپيتالى جانە اقشا قاراجاتتارىن ەسكەرە وتىرىپ تۇزەتىلەدى.
مامىلەگە باتىس قازاقستان وبلىسىنداعى مۇناي-گاز اكتيۆتەرىنە قۇقىعى بار ەكى كومپانيا كىرەدى. «جايىقمۇناي» ج ش س چينارەۆسكوە كەن ورنىن يگەرۋ قۇقىعىنا يە، ال «پوزيتيۆ ينۆەست» ج ش س كامەنسكوە جانە كامەنسكو-تەپلوۆسكو-توكارەۆسكوە ۋچاسكەلەرىنە قۇقىقتاردى يەلەنەدى.
ەكى ۇلەستىڭ دە ساتىپ الۋشىسى Altaris Holding Ltd. بولادى، ونىڭ قۇرىلتايشىلارى Fincraft Energy Holding Limited جانە Alturion Holding Limited بولىپ تابىلادى. Fincraft Energy Holding Limited كەڭەس راكيشەۆتىڭ Fincraft Group قۇرىلىمىنا كىرەدى، ال Alturion Holding Limited اكسيونەرى باا-دە تىركەلگەن ALTURION FZCO بولىپ تابىلادى.
مامىلەنىڭ سەبەبى Nostrum كومپانياسىنىڭ قارىز جۇكتەمەسى بولدى. توپتىڭ وبليگاسيالارى 2026 جىلعى 30 ماۋسىمدا وتەلۋگە ءتيىس ەدى، الايدا كومپانيا كرەديتورلار الدىنداعى مىندەتتەمەلەرىن تولىق ورىنداي المادى. قازاقستاندىق اكتيۆتەردى ساتۋ اياقتالعاننان كەيىن Nostrum قامتاماسىز ەتىلگەن وبليگاسيالاردى تولىق وتەپ، قامتاماسىز ەتىلمەگەندەرى بويىنشا ءىشىنارا ەسەپتەسۋدى جوسپارلاپ وتىر. قامتاماسىز ەتىلمەگەن وبليگاسيالار ۇستاۋشىلارىنا ءبىرىنشى كەزەڭدە شامامەن $150 ملن تولەۋ جوسپارلانۋدا.
مامىلە اياقتالعاننان كەيىن Nostrum بۇكىل توپتى رەتتەلگەن تۇردە جابۋعا كىرىسپەك. كومپانيا سونداي-اق كرەديتورلارمەن ەسەپتەسكەننەن كەيىن اكسيونەرلەرگە قالاتىن ەلەۋلى قاراجات بولمايتىنىن ەسكەرتەدى.
اكتيۆتەردى ساتۋدان تۇسكەن $304،6 ملن ەڭ الدىمەن Nostrum مىندەتتەمەلەرىن وتەۋگە جۇمسالۋى ءتيىس.
ساتۋ ءالى اياقتالعان جوق. مامىلەنى جابۋ ءۇشىن ءبىرقاتار شارتتاردى ورىنداۋ قاجەت، ونىڭ ىشىندە قازاقستاندىق رەتتەۋشىلەردىڭ، ەنەرگەتيكا مينيسترلىگىنىڭ، QazaqGaz كومپانياسىنىڭ جانە وبليگاسيالار ۇستاۋشىلارىنىڭ ءبىر بولىگىنىڭ كەلىسىمى. تاعى ءبىر شارت – ساتىپ الۋشى تاراپىنان قارجىلاندىرۋدى راستاۋ. شارتتاردى ورىنداۋدىڭ بازالىق سوڭعى مەرزىمى 2026 جىلعى 15 قىركۇيەك بولىپ بەلگىلەنگەن، قاجەت بولعان جاعدايدا ول تاعى ەكى ايعا اۆتوماتتى تۇردە ۇزارتىلۋى مۇمكىن.
كەڭەس راكيشيەۆ Forbes قۇراستىراتىن قازاقستاننىڭ ەڭ باي بيزنەسمەندەرى رەيتينگىندە 27-ورىندا تۇر. ونىڭ بايلىعى $402 ملن دەپ باعالانادى، بۇل 2025 جىلعى رەيتينگپەن سالىستىرعاندا $33 ملن-عا از. بۇعان دەيىن «كۋرسيۆ» كەڭەس راكيشەۆتىڭ كومپانياسى 400 ملن تەڭگەگە جۋىق ديۆيدەند تولەيتىنىن جازعان بولاتىن.