شەشەن رەسپۋبليكاسىنىڭ باسشىسى رامزان قادىروۆ رەسەي مۇسىلماندارىنىڭ رۋحاني جينالىسىنىڭ جوعارى ماراپاتى – رەسەيدىڭ تۇڭعىش ءمۇفتيى مۇحامەدجان حۇسايىنوۆ اتىنداعى I دارەجەلى وردەنمەن ماراپاتتالدى. بۇل تۋرالى ۇيىمنىڭ ءباسپاسوز قىزمەتى حابارلادى، دەپ جازادى infohub.kz.
رەسەي مۇسىلماندارىنىڭ رۋحاني جينالىسىنىڭ باسشىسى، ماسكەۋ ءمۇفتيى ءالبىر حازرەت قورعانوۆتىڭ ايتۋىنشا، ماراپاتتاۋ تۋرالى شەشىمدى ۇيىمنىڭ ءتورالقاسى قابىلداعان. «رەسەي مۇسىلماندارىنىڭ رۋحاني جينالىسى ءتورالقاسىنىڭ شەشىمىمەن قوعامدىق ديپلوماتيانى دامىتۋداعى ەرەكشە ەڭبەگىڭىز، ءداستۇرلى رۋحاني-ادامگەرشىلىك قۇندىلىقتاردى نىعايتۋداعى، ءدىنارالىق بەيبىتشىلىك پەن كەلىسىمگە قول جەتكىزۋدەگى ايتارلىقتاي ۇلەسىڭىز ءۇشىن ءسىز (رامزان قادىروۆ – رەد. ەسك.) رەسەي مۇسىلماندارىنىڭ رۋحاني جينالىسىنىڭ جوعارى ماراپاتىنا يە بولدىڭىز»، – دەپ كەلتىرەدى ونىڭ سوزدەرىن ربك.
ءمۇفتي سونداي-اق قادىروۆتى 50 جاسقا تولۋىمەن قۇتتىقتاپ، ونىڭ شەشەنستاندى دامىتۋعا، مەشىتتەر مەن مەدرەسەلەر سالۋعا قوسقان ۇلەسىن، سونداي-اق مۇقتاج جاندارعا، رەسەيلىك اسكەري قىزمەتشىلەر مەن ولاردىڭ وتباسىلارىنا كورسەتكەن كومەگىن اتاپ ءوتتى.
ايتا كەتەيىك، قادىروۆقا بەرىلگەن وردەن تەك 2026 جىلى – رەسەي مۇسىلماندارىنىڭ رۋحاني جينالىسىنىڭ ون جىلدىعىنا وراي تاعايىندالعان. ماراپاتتىڭ ءۇش دارەجەسى بار، ونىڭ ىشىندە ءبىرىنشى دارەجەسى جوعارى بولىپ سانالادى.
ەسكە سالايىق، قىركۇيەكتە رامزان قادىروۆ شەشەنستان باسشىسى سايلاۋىندا جەڭىسكە جەتكەن بولاتىن. ول بۇل قىزمەتتە 2007 جىلدان بەرى وتىر – رەسەي وڭىرلەرىنىڭ باسقا باسشىلارىنا قاراعاندا ۇزاق ۋاقىت. سونداي-اق جاقىندا شەشەن كوشباسشىسى رەسەي ارمياسىنىڭ گەنەرال شەنىن جانە قىزىل بەرەتتى الدى.