قازاقستانداعى 4،2 مىڭ توزىعى جەتكەن جانە اۆاريالىق كوپپاتەرلى ءۇيدىڭ يەلەرىن قونىستاندىرۋعا 3،2 ترلن تەڭگە ينۆەستيسيا قاجەت ەكەنىن infohub.kz حابارلايدى.
قۇرىلىس مينيسترلىگىنىڭ قۇرىلىس جانە تۇرعىن ۇي-كوممۋنالدىق شارۋاشىلىق ىستەرى كوميتەتى ءتوراعاسىنىڭ ورىنباسارى قانات مىڭبايەۆ ورتالىق كوممۋنيكاسيالار قىزمەتىندەگى بريفينگتە اكىمدىكتەردىڭ دەرەگىنشە، ەلىمىزدە 4،2 مىڭ توزىعى جەتكەن جانە اۆاريالىق كوپپاتەرلى ءۇي بار ەكەنىن ايتتى. ولاردى رەنوۆاسيالاۋ، ياعني پاتەر يەلەرىن جاڭا باسپاناعا قونىستاندىرۋ ءۇشىن 3،2 ترلن تەڭگە قاجەت.
بۇعان دەيىن پرەزيدەنت اۆاريالىق جانە توزىعى جەتكەن تۇرعىن ءۇي يەلەرىنىڭ 40 مىڭىن جاڭا باسپانامەن قامتاماسىز ەتۋ مىندەتىن قويعان بولاتىن. ينۆەستور-قۇرىلىسشىلاردى تارتۋ ءۇشىن جەر جانە قۇرىلىس كودەكستەرىنە، سونداي-اق ءبىرقاتار زاڭدارعا وزگەرىستەر ەنگىزىلدى. ولار ەسكى تۇرعىن ءۇيدى ساتىپ الۋدىڭ ءارتۇرلى تەتىكتەرىن، سونىڭ ىشىندە جاڭا قۇرالدى قاراستىرادى.
جاڭا قۇرال – ءبىرىڭعاي وپەراتوردىڭ كەپىلدىگى. ول قۇرىلىسشىلارعا ۇلەستىك قاتىسۋ تەتىگى ارقىلى رەنوۆاسيا جۇرگىزۋگە مۇمكىندىك بەرەدى. بۇل رەتتە «قازاقستان تۇرعىن ءۇي كومپانياسى» (قتۇك) ۇلەسكەرلەرگە ولاردىڭ باسپاناسى كەز كەلگەن جاعدايدا سالىنىپ بىتەتىنىنە كەپىلدىك بەرەدى.
توزىعى جەتكەن ۇيلەردىڭ تۇرعىندارى ءوز پاتەرلەرىن «بولمەگە بولمە» قاعيداتى بويىنشا بەرە الادى، ال قۇرىلىسشىلار قتۇك كەپىلدىكتەرىن پايدالانۋ مۇمكىندىگىنە يە بولادى. بۇل جاعدايدا قۇرىلىسشى تۇرعىن ءۇي كومپانياسىمەن كەلىسىمشارت جاساسىپ، مەنشىك يەلەرىمەن كەلىسسوز جۇرگىزەدى، ولاردىڭ م ۇلىكتى بەرۋگە قولدارىن جينايدى، كەپىلدىك شارتىن جاساسۋ ءۇشىن قتۇك-گە جۇگىنەدى، سودان كەيىن ەسكى تۇرعىن ءۇيدى بۇزىپ، جاڭاسىن سالادى.
قۇرىلىس ىستەرى كوميتەتى رەنوۆاسيا بارىسى تۋرالى دا ايتىپ بەردى. 2023-2025 جىلدار ارالىعىندا قازاقستاندا 291 اۆاريالىق كوپپاتەرلى تۇرعىن ءۇي (كپتۇ) بۇزىلىپ، 4 996 مەنشىك يەسى جاڭا باسپانا الدى. وسى كەزەڭدە تۇرعىنداردى قونىستاندىرۋ ءۇشىن 132 جاڭا ءۇي سالىندى.
2023 جىلى جوسپار بويىنشا 77 ءۇيدىڭ 75ء-ى بۇزىلىپ، 52 جاڭا ءۇي سالىندى. 1 010 مەنشىك يەسى پاتەر الدى. 2024 جىلى جوسپارداعى 121 ءۇيدىڭ 115ء-ى بۇزىلىپ، 80 جاڭا كپتۇ تۇرعىزىلىپ، 1 381 مەنشىك يەسى باسپانامەن قامتاماسىز ەتىلدى. 2025 جىلى جوسپارداعى 227 ءۇيدىڭ 101ء-ى بۇزىلدى، ونىڭ 62ء-سى جەكە ينۆەستورلار ەسەبىنەن، 39-ى جەرگىلىكتى بيۋدجەتتەر ەسەبىنەن. جاڭا باسپانا 2 605 مەنشىك يەسىنە بەرىلدى.
2026 جىلى بيلىك 224 اۆاريالىق كوپپاتەرلى ءۇيدى بۇزۋدى جوسپارلاپ وتىر. قازىرگى تاڭدا 44 عيمارات بۇزىلدى. مەنشىك يەلەرىن قونىستاندىرۋ جەرگىلىكتى بيۋدجەتتەر ەسەبىنەن – وتەماقى تولەۋ جانە باسپانانى قايتالاما نارىقتان ساتىپ الۋ ارقىلى جالعاسۋدا.
بۇعان دەيىن حابارلانعانداي، جاڭا رەنوۆاسيا باعدارلاماسىنا قاراماستان، الماتىنىڭ 43 مىڭنان استام تۇرعىنى ەسكى ۇيلەردە تۇرۋدى جالعاستىرۋدا.