رەسەيدە قازاقستاندا الدەقاشان ءساتتى ەنگىزىلگەن ەكپە جاساۋعا ەندى عانا دايىندىق باستالدى: 2027 جىلدان باستاپ رەسەيلىك دارىگەرلەر 12–13 جاسار قىزداردى ادام پاپيللوماۆيرۋسىنا — جاتىر موينى وبىرىنىڭ باستى سەبەبىنە قارسى جاپپاي ەگەي باستايدى. بۇل تۋرالى ينتەرفاكس جازىپ، infohub.kz سايتى حابارلايدى.
رەسەي دەنساۋلىق ساقتاۋ مينيسترلىگىنىڭ باسشىسى ميحايل مۋراشكو ايتۋىنشا، جاسوسپىرىمدەرگە رەسەيلىك وندىرىستەگى پرەپارات ەگىلەدى. بۇل شارا ايەلدەر اراسىنداعى ءولىم-جىتىمدى كۇرت ازايتىپ، ولاردىڭ رەپرودۋكتيۆتى دەنساۋلىعىن ساقتاۋعا ءتيىس.
ونىڭ سوزىنشە، 2027 جىلدىڭ باسىنان باستاپ دايىندىق راسىمدەرى جۇرگىزىلەدى، ال جىلدىڭ ەكىنشى جارتىسىنان باستاپ 12–13 جاسار قىزداردى ەگۋگە كىرىسەدى.
«قالاي بولعاندا دا، ءقازىر ءبىز وسىلاي بولجاپ وتىرمىز جانە بۇل بۇگىنگى تاڭدا وتاندىق ونىممەن دە قامتاماسىز ەتىلگەن»، – دەدى ول «انا جانە بالا» فورۋمىندا.
باسىلىمنىڭ مالىمەتىنشە، جاسوسپىرىمدەردى رەسەيلىك «سەگاردەكس» پرەپاراتىمەن ەگۋ جوسپارلانۋدا. ازىرلەۋشى «نانولەك» كومپانياسىنىڭ باسشىسى بۇعان دەيىن ۆاكسينا رەسمي تۇردە اينالىمعا شىققانىن حابارلاعان. 30 مىڭ دوزادان تۇراتىن العاشقى لەگى وسى ايدىڭ سوڭىنا دەيىن ەمحانالار مەن اۋرۋحانالارعا جونەلتىلەدى.
ايتا كەتەيىك، رەسەيدە جاتىر موينى وبىرى 15 پەن 44 جاس ارالىعىنداعى رەسەيلىك ايەلدەردە انىقتالۋ جيىلىگى بويىنشا ەكىنشى ورىندا تۇر. سونىمەن قاتار 44 جاسقا دەيىنگى ايەلدەردە وبىر اۋرۋلارىنان بولاتىن ءولىمنىڭ باستى سەبەبى — ءدال وسى جاتىر موينى وبىرى.
قازاقستاندا 11–13 جاسار قىزداردى ەگۋ 2024 جىلدىڭ قىركۇيەگىندە باستالعان. ال 2026 جىلدىڭ مامىرىنان باستاپ 14–17 جاسار قىزدارعا دا ەكپە سالىنا باستادى.
شىلدەدە ايتىلعانداي، قىسقا مەرزىمنىڭ ىشىندە پرەپاراتتىڭ ءبىرىنشى دوزاسىن 32 مىڭنان استام ءجاسوسپىرىم العان.