رەسەيدىڭ قۇقىق قورعاۋ ورگاندارى ب ا ق پەن الەۋمەتتىك جەلىلەردە رەپەر دەنيس ۋستيمەنكو-ۆاينشتەيننىڭ (دجيگان دەگەن لاقاپ اتپەن تانىمال) قالا سىرتىنداعى ۇيىندە اتىس بولىپ، ادامدار كەپىلگە الىندى دەگەن حابارلامالار تاراعان سوڭ تەكسەرۋگە كىرىستى. بۇل تۋرالى 23 قىركۇيەكتە infohub.kz سايتى حابارلادى.
رەسەي ىشكى ىستەر مينيسترلىگىنىڭ ماسكەۋ وبلىسى بويىنشا ءباسپاسوز قىزمەتى پوليسەيلەردىڭ مۋزىكانتتىڭ ۇيىندەگى اتىس تۋرالى جاريالانىمعا قاتىستى تەكسەرۋ باستاعانىن مالىمدەدى.
بۇعان دەيىن بۇقارالىق اقپارات قۇرالدارى دجيگان ءوز ۇيىندە ادامداردى كەپىلگە الىپ، اتىس شىعارعان دەپ جازعان. 3 شىلدەدەن 4 شىلدەگە قاراعان ءتۇنى ول ءۇي قىزمەتكەرلەرىن شاقىرىپ الىپ، قولىنا قارۋ الىپ، ولارمەن ءتۇسىنىسۋ جۇرگىزگەنى ايتىلادى.
ول قىزمەتكەرلەردى قىلمىس جاسادى دەپ ايىپتاپ، ءومىرىن ساقتاپ قالۋ ءۇشىن مويىنداۋعا شاقىرعان.
باسىلىمنىڭ دەرەگىنشە، دجيگان ءبىر قىزمەتكەردى بالالارعا زورلىق-زومبىلىق جاسادى دەپ مويىنداۋعا ماجبۇرلەپ، كەيىن وعان وق اتىپ، ەر ادامنىڭ قولى مەن اياعىنا تيگىزگەن. قالعان قىزمەتكەرلەردى رەپەر ساتقىندىق، اقپارات تاراتۋ جانە ۇلتشىلدىق دەپ ايىپتاعان. سونداي-اق ولارعا قاشۋعا مۇمكىندىك بەرىپ، اتىس شىعارعان.
كەيىنىرەك دجيگان ب ا ق پەن الەۋمەتتىك جەلىلەردەگى بولعان وقيعا تۋرالى جاريالانىمدار شىندىققا ساي ەمەس دەپ مالىمدەدى. رەپەر قىزمەتكەرلەرگە وق اتقانىن جوققا شىعارادى. سونىمەن قاتار ءارتىس ءقازىر وڭالتۋ ورتالىعىندا جاتقانىن راستادى.
دجيگاننىڭ بۇرىنعى ايەلى — بلوگەر ءارى ينفليۋەنسەر وكسانا سامويلوۆانىڭ ادۆوكاتى رەپەردى اتا-انالىق قۇقىعىنان ايىرۋ مۇمكىندىگى تۋرالى سۇراققا جاۋاپ بەردى.