2026 جىلعى قاڭتار-مامىر قورىتىندىسى بويىنشا قازاقستاننىڭ سىرتقى ساۋدا اينالىمى 56،3 ملرد دوللارعا جەتىپ، وتكەن جىلدىڭ وسى كەزەڭىمەن سالىستىرعاندا 4،3%-عا ارتتى. جۇڭگو قازاقستاندىق ءونىمنىڭ ەڭ ءىرى ساتىپ الۋشىسى بولسا، رەسەي رەسپۋبليكاعا تاۋار جەتكىزۋدەگى باستى سەرىكتەس كۇيىندە قالۋدا. بۇل تۋرالى infohub.kz سايتى حابارلايدى.
اعىمداعى جىلدىڭ العاشقى بەس ايىندا قازاقستاننىڭ ەكسپورت كولەمى 30،36 ملرد دوللاردى قۇراپ، بىلتىرعى جىلمەن سالىستىرعاندا 1،6%-عا ءوستى. يمپورت 7،7%-عا ارتىپ، 25،99 ملرد دوللارعا جەتتى. يمپورتتىڭ قارقىندى وسۋىنە قاراماستان، قازاقستان سىرتقى ساۋدانىڭ وڭ سالدوسىن ساقتاپ قالدى.
ەۋرازيالىق ەكونوميكالىق وداق (ەاەو) ەلدەرىمەن ساۋدا اينالىمى 12،47 ملرد دوللارعا جەتىپ، جىلدىق كورسەتكىشتە 11،2%-عا ءوستى. ال ەاەو-عا مۇشە مەملەكەتتەرگە ەكسپورت 7،1%-عا تومەندەپ، 3،55 ملرد دوللاردى قۇراسا، يمپورت 20،6%-عا ارتىپ، 8،92 ملرد دوللارعا جەتتى. وداق ىشىندەگى نەگىزگى ساۋدا سەرىكتەسى – ءوزارا ساۋدا ۇلەسى 87،3% بولاتىن رەسەي. ودان كەيىن قىرعىزستان (8،2%)، بەلارۋس (4،1%) جانە ارمەنيا (0،3%) ورنالاسقان.
قازاقستان ەكسپورتىنىڭ قۇرامىندا شيكىزات ۇستەمدىك ەتۋدە. كوش باسىندا – شيكى مۇناي مەن مۇناي ونىمدەرى (44،6%)، تازارتىلعان مىس جانە وڭدەلمەگەن مىس قورىتپالارى (7،6%)، مىس كەندەرى مەن كونسەنتراتتارى (5،9%)، فەرروقورىتپالار (3%)، بيداي مەن مەسلين (2،8%).
يمپورتتا ەڭ ۇلكەن ۇلەستى جەڭىل اۆتوموبيلدەر مەن باسقا دا موتورلى كولىك قۇرالدارى الادى (3،1%). سونداي-اق ءىرى يمپورتتالاتىن تاۋارلار قاتارىندا تەلەفون اپپاراتتارى (2،7%)، دارى-دارمەكتەر (2،5%)، مۇناي گازدارى جانە باسقا گاز تارىزدەس كومىرسۋتەكتەر (2،5%)، ەلەكتر گەنەراتورلىق قوندىرعىلار مەن اينالمالى ەلەكتر تۇرلەندىرگىشتەرى (2،4%) بار.
جۇڭگو قازاقستاندىق تاۋارلاردىڭ ەڭ ءىرى وتكىزۋ نارىعى بولىپ قالۋدا، وعان جالپى ەكسپورتتىڭ 19،9%-ى تيەسىلى. العاشقى التى ساتىپ الۋشى قاتارىنا يتاليا (16،4%)، رەسەي (8،8%)، تۇركيا (7،6%)، نيدەرلاند (6،3%) جانە وزبەكستان (5،8%) كىرەدى. قازاقستانعا تاۋار جەتكىزۋدىڭ باستى سەرىكتەسى – رەسەي، ول جالپى يمپورتتىڭ 31،6%-ىن قامتاماسىز ەتەدى. ودان كەيىن جۇڭگو (28،8%)، گەرمانيا (4،9%)، اقش (4،4%)، كورەيا رەسپۋبليكاسى (2،5%) جانە تۇركيا (2،2%) ورنالاسقان.
بۇعان دەيىن قازاقستاننىڭ سيىر ەتىن باسقا ەلدەرگە شىعارۋ كۆوتاسىن ۇزارتاتىنى بەلگىلى بولدى. ەكونوميست رۋسلان سۇلتانوۆ قازاقستاننىڭ ساۋدادا جۇڭگو مەن رەسەيگە تاۋەلدىلىگى ارتىپ كەلە جاتقانىن مالىمدەدى.