رەسەي ناتو-عا ديپلوماتيالىق نوتا جولداپ، كالينينگراد وبلىسىن ەلدىڭ قالعان اۋماعىنان وقشاۋلاۋعا ارەكەت جاسالسا، يادرولىق قارۋ قولدانۋعا دايىن ەكەنىن ەسكەرتتى. قۇجاتپەن Reuters اگەنتتىگى تانىسقان، بۇل تۋرالى infohub.kz سايتى حابارلايدى.
نوتادا ماسكەۋ اليانستى «ءقاۋىپتى جانە اقىلعا سىيمايتىن باعىت» ۇستانىپ، «تىكەلەي قارۋلى قاقتىعىستىڭ باستالۋ ءقاۋپىن جوعارىلاتىپ وتىر» دەپ ايىپتادى. رەسەي تاراپى سونداي-اق ىقتيمال قاقتىعىس باستالعان ساتتەن باستاپ ناتو ەلدەرىندەگى شەشىم قابىلدايتىن ورتالىقتارعا سوققى بەرۋگە جول بەرەتىنىن ءبىلدىردى.
«ەگەر ناتو ەلدەرى كالينينگراد وبلىسىن ەلدىڭ قالعان بولىگىنەن وقشاۋلاۋعا باعىتتالعان قانداي دا ءبىر ارەكەت جاساسا، رەسەي ءوز اۋماعىن قورعاۋ ءۇشىن ءوز قاراماعىنداعى بارلىق كۇش پەن مۇمكىندىكتەر ارسەنالىن، سونىڭ ىشىندە يادرولىق قارۋدى قولدانۋعا دايىن بولادى»، — دەلىنگەن ديپلوماتيالىق نوتادا.
كالينينگراد وبلىسى — بالتىق تەڭىزى جاعالاۋىنداعى، پولشا مەن ليتۆا اراسىندا ورنالاسقان رەسەيدىڭ ەكسكلاۆى.
رەسەي ءسىم وكىلى ماريا زاحاروۆا ماسكەۋ ءوز ەسكەرتۋلەرىن الۋشىلارعا جەتكىزۋدى كوزدەپ وتىرعانىن مالىمدەدى. كرەمل ءباسپاسوز حاتشىسى دميتري پەسكوۆ مۇنداي وتىنىشتەردى «ەۋروپاداعى قىزبا باستارعا» ديپلوماتيالىق ەسكە سالۋ دەپ اتادى.
ناتو باس حاتشىسى مارك ريۋتتە اليانستىڭ قورعانىس سيپاتىندا ەكەنىن ايتىپ، رەسەيدى يادرولىق قاۋىپ-قاتەرلەردەن باس تارتۋعا شاقىردى.
«ءبىز — قورعانىس اليانسىمىز. يادرولىق قاۋىپ-قاتەرلەردى توقتاتىڭىزدار. بۇل مۇلدەم قاجەت ەمەس جانە پايدا اكەلمەيدى»، — دەدى ريۋتتە.
رەسەي نوتاسىنا جازباشا جاۋابىندا ناتو ءوزىنىڭ وقۋ-جاتتىعۋلارى مەن باسقا دا ءىس-شارالارى رەسەي فەدەراسياسىنىڭ اۋماعىنا ءقاۋىپ توندىرمەيتىنىن اتاپ ءوتتى.
«ءبىز رەسەي فەدەراسياسىن ۋكرايناعا نەگىزسىز باستالعان تولىق اۋقىمدى باسقىنشىلىقتى توقتاتۋعا شاقىرامىز. ءبىز رەسەي فەدەراسياسىن وداقتاستارعا قاتىستى بارعان سايىن اقىلعا سىيمايتىن مىنەز-ق ۇلىقتان باس تارتۋعا جانە جاۋاپسىز يادرولىق ريتوريكاسىن توقتاتۋعا قاتتى شاقىرامىز»، — دەلىنگەن اليانس جاۋابىندا.
بالتىق ەلدەرىنە يادرولىق ءقاۋىپتىڭ شىنايىلىعى تۋرالى سۇراققا ريۋتتە تەرىس جاۋاپ بەردى.
«جوق، ولاي ەمەس. پۋتين ناتو-نى ەشقاشان جەڭە المايتىنىن بىلەدى، سوندىقتان مەن مۇنى بايىپتى قابىلدامايمىن»، — دەدى ول بريۋسسەلدەگى قورعانىس كونفەرەنسياسىندا.