جۇما كۇنى ۋكراينانىڭ كييەۆ وبلىسىنداعى قورعانىس ونەركاسىبى ءىس-شاراسى وتكەن ورىنعا رەسەي بالليستيكالىق زىمىرانى سوققى بەرىپ، 10 ادام قازا تاۋىپ، 100-گە جۋىق ادام جاراقات الدى، دەپ حابارلايدى infohub.kz سايتى.
ۋكراينا پرەزيدەنتى ۆلاديمير زەلەنسكي ناقتى نىسانانى اتاماي، بولعان وقيعانىڭ ءمان-جايىن انىقتاۋ جۇمىستارى ءجۇرىپ جاتقانىن ايتتى. ول Telegram-دا: «كييەۆ وبلىسىندا رەسەيلىك زىمىران سوققىسىنان كەيىن قۇتقارۋ وپەراسياسى جۇرگىزىلۋدە»،— دەپ جازدى.
كييەۆ وبلىسى اكىمىنىڭ مىندەتىن اتقارۋشى رۋسلان ولينيكتىڭ ايتۋىنشا، الدىن الا مالىمەتتەر بويىنشا بالليستيكالىق زىمىران جەكە مەنشىك جاتتىعۋ الاڭىنا سوعىلعان. سول جەردە ءىس-شارا ءوتىپ جاتقان ەدى. ۋكراينا قورعانىس ونەركاسىبى كەڭەسى زىمىران سوققىسى ۋكراينا قورعانىس ونەركاسىبى وكىلدەرى جينالعان ورىنعا تيگەنىن، الايدا ولار ءىس-شارانى ۇيىمداستىرۋشى بولماعانىن مالىمدەدى. قاتىسۋشىلاردىڭ ناقتى ورنى جاريالانباعانىن قوستى.
ۋكراينالىق «First Contact» درون كومپانياسىنىڭ نەگىزىن قالاۋشى ۆالەري بوروۆيك ۋكراين باق-قا زىمىران قورعانىس ونەركاسىبى كورمەسى ءوتىپ جاتقان جاتتىعۋ الاڭىنا سوعىلعانىن حابارلادى. ۋكراينا باس پروكۋرورى رۋسلان كراۆچەنكو ءىس-شارانى ۇيىمداستىرۋ جانە وتكىزۋ كەزىندە قىزمەتتىك مىندەتتەردى تيىسىنشە ورىنداماۋ مۇمكىندىگىنە قاتىستى قىلمىستىق ءىس قوزعالعانىن مالىمدەدى.