شىعىس قازاقستان وبلىسىنداعى ريددەر ماڭىندا ەلەكتر بەرۋ جەلىلەرىن تارتۋ جۇمىستارى سەگىز جىلعا سوزىلىپ كەتتى، دەپ حابارلايدى infohub.kz سايتى. قورىقتار مەن دەمالىس بازالارىنا اپاراتىن بەتون باعانالار مەن ەلەكتر كوممۋنيكاسيالارى ءالى كۇنگە دەيىن توكقا قوسىلماعان.
سونىمەن قاتار، تايگالى ايماقتا تۇراتىن جەرگىلىكتى تۇرعىندار 40 جىلدان بەرى ەلەكتر قۋاتىن بەنزين گەنەراتورلارىمەن الىپ كەلەدى.
ءمالىم بولعانداي، ەلەكتر جەلىسىن سالۋعا 2017 جىلى-اق بيۋدجەتتەن 700 ملن تەڭگەدەن استام قاراجات بولىنگەن. ونىڭ 400 ملن تەڭگەسى يگەرىلگەن، الايدا جوبا اياقتالماي قالعان، ال مەردىگەرگە ايىپپۇل تولەنگەن.
كەيىننەن قۇرىلىس بيۋروكراتيالىق كەدەرگىلەرگە بايلانىستى توقتاتىلدى. ەلەكتر بەرۋ جەلىلەرى مەملەكەتتىك ورمان قورىنىڭ جەرىنەن وتكەنى، ال وندا ەلەكتر جەلىلەرىن مونتاجداۋعا تىيىم سالىنعانى انىقتالدى. دەگەنمەن قازىرگى تاڭدا جەر زاڭناماسىنىڭ نورمالارى جەڭىلدەتىلىپ، ينجەنەرلىك جەلىلەردى مونتاجداۋ جەكەلەگەن جاعدايلاردا رۇقسات ەتىلەتىن بولدى. سوندىقتان جەرگىلىكتى بيلىك جوبانى قايتا جانداندىرۋدى كوزدەپ وتىر.
«ءقازىر زاڭناماعا وزگەرىستەر ەنگىزىلدى. 2017 جىلى زاڭ جۇزىندە قاتاڭ تىيىم سالىنعان بولسا، بۇگىندە ينفراقۇرىلىمدىق جوبالارعا – جولدار، بايلانىس، ەلەكتر بەرۋ جەلىلەرى – بارلىق مۇددەلى مەملەكەتتىك ورگاندارمەن كەلىسىم بويىنشا جۇرگىزۋگە بولادى»، – دەدى ريددەر اكىمىنىڭ ورىنباسارى قانىبەك تولەۋحان.