رينات مۇحامەتقالي قازاقستان پرەزيدەنتى اكىمشىلىگىندە جاڭا قىزمەتكە تاعايىندالدى. ءتيىستى وكىمگە مەملەكەت باسشىسى قاسىم-جومارت توقايەۆ قول قويدى، دەپ حابارلايدى infohub.kz سايتى.
اقوردانىڭ مالىمەتىنشە، مۇحامەتقالي رينات زاكي ۇلى ق ر پرەزيدەنتى اكىمشىلىگىنىڭ جالپى ءبولىمىنىڭ مەڭگەرۋشىسى بولىپ تاعايىندالدى. بۇعان دەيىن ول ق ر مادەنيەت جانە اقپارات مينيسترلىگى اپپاراتىنىڭ باسشىسى قىزمەتىن اتقارعان.
رينات مۇحامەتقالي 1981 جىلى دۇنيەگە كەلگەن، م.ح. دۋلاتي اتىنداعى تاراز مەملەكەتتىك ۋنيۆەرسيتەتىن «قۇقىقتانۋ» ماماندىعى بويىنشا بىتىرگەن. ءارتۇرلى ۇيىمداردا قىزمەتىن باستاپ، 2004 جىلى ادىلەت مينيسترلىگىنە اۋىسىپ، التى جىل ىشىندە جەتەكشى ماماننان دەپارتامەنت ديرەكتورىنىڭ ورىنباسارىنا دەيىنگى جولدى وتكەن.
ونىڭ كاسىبي ءومىربايانىنىڭ ۇلكەن بولىگى پرەزيدەنت اكىمشىلىگىمەن بايلانىستى: 2010-2021 جىلدارى مەملەكەتتىك قىزمەت جانە كادر ساياساتى بولىمىندە جۇمىس ىستەگەن، ال 2022-2023 جىلدارى پرەزيدەنت اكىمشىلىگى باسشىسىنىڭ حاتشىلىعىن باسقارعان. اقورداعا قازىرگى قىزمەتكە ورالعانعا دەيىن مۇحامەتقالي مەملەكەتتىك قىزمەت ىستەرى اگەنتتىگىنىڭ اپپاراتىن دا باسقارعان، ال 2023 جىلدىڭ قاڭتارىنان باستاپ قوستاناي وبلىسى اكىمىنىڭ ورىنباسارى قىزمەتىن اتقارعان.