قازاقستاندىق ۆەلوشاباندوزى ريناتا سۇلتانوۆا جاپونيادا وتكەن ازيادا-2026 ويىندارىنىڭ توپتىق تاسجول جارىسىندا سەگىزىنشى ورىنعا تۇراقتادى. ول قاشىقتىقتى 2 ساعات 52 مينۋت 41 سەكۋندتا ءجۇرىپ ءوتىپ، جەڭىمپازدان 2 مينۋت 36 سەكۋندقا قالىپ قويدى، دەپ حابارلايدى infohub.kz سايتى.
قازاقستاننىڭ تاعى ەكى وكىلى العاشقى وندىققا كىرە المادى. ەليزاۆەتا سكلياروۆا 2:55:52 ناتيجەسىمەن 15-ورىنعا تۇراقتاپ، كوشباسشىدان 5 مينۋت 47 سەكۋندقا ارتتا قالدى. ۆيولەتا كازاكوۆا بولسا 23-ورىندى يەلەندى — 2:58:00 (+7:55).
التىن مەدالدى قىتايلىق لي گو جەڭىپ الدى، ول قاشىقتىقتى 2:50:05 ۋاقىتتا باعىندىردى. اۋعانستاندىق فاريبا حاشيمي دە ءدال وسىنداي ۋاقىت كورسەتىپ، ەكىنشى ورىنعا شىقتى. قولا گونكونگ وكىلى لەۋنگ ۆين ييگە بۇيىردى — 2:50:46.
ازيا ويىندارى-2026. 22 قىركۇيەك. ۆەلوسپورت. توپتىق تاسجول جارىسى. ايەلدەر. 1. لي گو (جۇڭگو) — 2:50:05. 2. فاريبا حاشيمي (اۋعانستان) — 2:50:05. 3. لەۋنگ ۆين يي (گونكونگ) — 2:50:46. 8. ريناتا سۇلتانوۆا (قازاقستان) — 2:52:41. 15. ەليزاۆەتا سكلياروۆا (قازاقستان) — 2:55:52. 23. ۆيولەتا كازاكوۆا (قازاقستان) — 2:58:00.
سۇلتانوۆا ءۇشىن بۇل اعىمداعى ازياداداعى ەكىنشى جارىسى ەدى. 20 قىركۇيەكتە قازاقستاندىق شاباندوز جەكەلەي بولەك ستارتتىق جارىستا جەڭىسكە جەتىپ، قازاقستان قۇراماسىنا ويىندارداعى العاشقى التىنىن سىيلادى.
ويىنداردىڭ رەسمي اشىلۋى 19 قىركۇيەكتە ءوتتى. 45 ەلدىڭ سپورتشىلارى قاتىساتىن كەشەندى جارىستاردا 460 مەدال جيىنتىعى ساراپقا سالىنادى: 217ء-سى — ەرلەر اراسىندا، 204ء-ى — ايەلدەر اراسىندا، 39-ى — ارالاس رازريادتاردا. ازيادا-2026-دا قازاقستان قۇراماسىنىڭ نامىسىن 35 سپورت تۇرىنەن 558 سپورتشى قورعايدى.
ويىنداردىڭ ءبىرىنشى كۇنى قازاقستاندىقتار ءتورت التىن مەدال جەڭىپ الدى. ويىندار چەمپيوندارى اتانعاندار: ۆەلوشاباندوزدار ريناتا سۇلتانوۆا مەن الەكسەي لۋسەنكو، سونداي-اق كاراتەشىلەر جولامان بيگابىل مەن سوفيا بەرۋلسەۆا. ەكىنشى كۇننەن كەيىن قازاقستان بەيرەسمي كوماندالىق ەسەپتە ءتورتىنشى ورىندا تۇردى.