ەركىن كۇرەستەن قازاقستان سپورتشىلارى ريزابەك ايتمۇحان مەن نۇردانات ايتانوۆ جاپونيادا ءوتىپ جاتقان جازعى ازيا ويىندارىندا مەدالسىز قالدى، دەپ حابارلايدى infohub.kz سايتى.
97 كەلىگە دەيىنگى سالماق دارەجەسىندەگى شيرەك فينالدا ريزابەك ايتمۇحان الاڭ يەسى اراش وسيدامەن كەزدەستى. كەزدەسۋ جاپون بالۋانىنىڭ 11:1 ەسەبىمەن جەڭىسىمەن اياقتالدى.
ءبىرىنشى كەزەڭدە ءوسيدا التى ۇپايدى قارسىلاسىنا مۇمكىندىك بەرمەي جينادى. ۇزىلىستەن كەيىن ايتمۇحان ءوزىنىڭ العاشقى ۇپايىن الدى، الايدا جاپوندىق باسىمدىعىن ودان ءارى ارتتىرىپ، تەحنيكالىق باسىمدىقپەن كەزدەسۋدى مەرزىمىنەن بۇرىن اياقتادى.
وسىلايشا، ايتمۇحان جارتىلاي فينالعا شىعا المادى. كەيىن ءوسيدا قازاقستاندىق بالۋانعا جۇبانىش ءتۋرنيرى ارقىلى جۇلدە ءۇشىن كۇرەسۋدى جالعاستىرۋ مۇمكىندىگىن بەرمەگەندىكتەن، ريزابەك ازيا ويىندارىن مەدالسىز اياقتادى.
قازاقستاننىڭ تاعى ءبىر وكىلى، 57 كەلىگە دەيىنگى سالماقتا كۇرەسەتىن نۇردانات ايتانوۆ قولا فينالىنا شىعۋ ءۇشىن جۇبانىش كەزەڭى ارقىلى كۇرەسۋ مۇمكىندىگىن الدى. ونىڭ قارسىلاسى جاپوندىق بالۋان ياماتو وگاۆا بولدى.
ايتانوۆ جارىس يەسىنە 0:6 ەسەبىمەن جول بەردى. ءبىرىنشى كەزەڭدە وگاۆا ەكى ۇپاي جيناسا، ەكىنشى كەزەڭدە تاعى ءتورت ۇپاي قوستى. ناتيجەسىندە قازاقستاندىق جۇبانىش بەلدەسۋىندە جەڭىلىپ، ازيادا-2026-نىڭ قولا مەدالى ءۇشىن بەلدەسۋسىز قالدى.