قايىقپەن ءوتىپ بارا جاتقان پانا ىزدەۋشىلەردى قۇتقارعانى ءۇشىن وڭشىل راديكالداردىڭ شابۋىلىنا ۇشىراعان RNLI قايىرىمدىلىق ۇيىمى قاۋىپسىزدىك شارالارىن كۇشەيتتى. ۇيىم باسشىلىعى ەرىكتىلەرگە ءقاۋىپ تونگەن جاعدايدا RNLI لوگوتيپى بار كيىمدى كيمەۋگە كەڭەس بەردى، دەپ حابارلايدى infohub.kz سايتى.
سونىمەن قاتار ەرىكتىلەرگە ءقاۋىپ سەزىنگەن جاعدايدا دۇكەندەردى نەمەسە قايىق ستانسيالارىن جابۋعا قۇقىلى ەكەندىكتەرى ايتىلدى. سوڭعى بىرنەشە كۇندە انگليانىڭ وڭتۇستىك جاعالاۋىنداعى RNLI بازالارىنىڭ اينالاسىندا قاۋىپسىزدىك كۇشەيتىلىپ، كەيبىر اۋماقتاردى پوليسيا مەن جەكە كۇزەتشىلەر باقىلاۋعا الدى.
ۇيىمنىڭ پۋولداعى شتاب-پاتەرىندە ءوز ءومىرىن قيعان RNLI ەرىكتىلەرىنە ارنالعان مەموريالدىق ءمۇسىن مەن قايىرىمدىلىق ۇيىمىنىڭ 200 جىلدىعىنا وراي وتىرعىزىلعان راۋشان گۇلزارىنىڭ اينالاسىنا قورشاۋلار ورناتىلدى. شتاب-پاتەرگە قارايتىن باقىلاۋ الاڭى جابىلدى.
RNLI جەكسەنبى كۇنى پانا ىزدەۋشىلەردى تاسىمالداعان قايىق پورتسمۋتقا اكەلىنگەن قۇتقارۋ وپەراسياسىنا قاتىسقانىنان كەيىن وڭشىل راديكالداردىڭ شابۋىلىنا قاراماستان، لا-مانش بۇعازىندا پانا ىزدەۋشىلەردى قۇتقارۋدى جالعاستىرۋعا ۋادە بەردى.
الايدا جەكسەنبىدەگى نارازىلىقتان كەيىن RNLI باس ديرەكتورى ەرىكتىلەرگە ەلەكتروندىق حات جولداپ، قاۋىپسىزدىك ءتارتىبى قايتا قارالىپ جاتقانىن مالىمدەدى. ەرىكتىلەرگە RNLI كيىمىن كيمەۋدى ويلاستىرۋعا كەڭەس بەرۋمەن قاتار، قايىق ستانسيالارىنىڭ جانىندا جۇرگەن ادامداردىڭ جەكە كۋالىگى بولماسا، ولاردان سۇراۋ تالاپ ەتىلدى. سونداي-اق وزدەرىن جايسىز سەزىنسە، جۇرتشىلىقپەن سويلەسپەۋگە كەڭەس بەرىلدى.
جەكسەنبىدە پانا ىزدەۋشىلەر تۇسكەن جەرگە جاقىن ورنالاسقان پورتسمۋت قايىق ستانسياسىنىڭ قىزمەتكەرلەرىنە جۇرتشىلىق كەلىپ، RNLI ارەكەتتەرىن ءتۇسىندىرۋدى سۇراعان. RNLI قىزمەتكەرلەرى ينتەرنەتتە جانە تىكەلەي قورلىققا ۇشىراعانىن، سونداي-اق قايىرىمدىلىق ۇيىمى پانا ىزدەۋشىلەردى ورنالاستىردى نەمەسە جاعاعا شىعارعان سوڭ جاسىرىن جەرلەرگە كوشىردى دەگەن «نەگىزسىز» قاۋەسەتتەر تاراعانىن مالىمدەدى.
RNLI ەرىكتىلەرى مەن قىزمەتكەرلەرىن جانە عيماراتتارىن قورعاۋعا ءۇش پوليسيا بولىمشەسى جۇمىلدىرىلدى. دورسەت پوليسياسى شتاب-پاتەردىڭ قاۋىپسىزدىگىن قامتاماسىز ەتىپ جاتسا، حەمپشير قىزمەتكەرلەرى پورتسمۋتتاعى RNLI ستانسيالارىن ارالاپ ءجۇر. ساسسەكس پوليسياسى دا «RNLI ەرىكتىلەرىنە قاتىستى قورلايتىن جانە قورقىتاتىن پىكىرلەردى» تەرگەپ جاتىر.
جەكسەنبىدەگى وپەراسياعا قاتىسقان كەيبىر RNLI ەكيپاج مۇشەلەرىنىڭ سۋرەتتەرى الەۋمەتتىك جەلىلەردە جاريالانىپ، ولاردى ۇلىبريتانياعا «باسىپ كىرۋگە» قاتىسى بار دەپ ايىپتالدى.
سارسەنبى كۇنى پۋولداعى RNLI شتاب-پاتەرىنىڭ سىرتىندا «پۋول پاتريوتتارى» مەن «حەمپشير قارسىلىعى» مۇشەلەرىن قوسا العاندا، شامامەن 50 نارازىلىق ءبىلدىرۋشى جينالدى. نارازىلىق جەتەكشىلەرى ايەلدەرگە RNLI اكەلگەن ەركەكتەردەن ءقاۋىپ تونەدى دەپ زورلاۋ دابىلدارىن تاراتتى جانە حالىقتى قايىرىمدىلىق ۇيىمىنا قايىرمالدىق بەرۋدى توقتاتۋعا شاقىردى.