نيدەرلاند زەرتتەۋشىلەرى مي تىندەرى ارقىلى وزدىگىنەن جول تاباتىن بۇراما ءپىشىندى شاعىن روبوت جاساپ شىعاردى. بۇل تەحنولوگيا ميدىڭ تەرەڭ بولىكتەرىنە ءدارى جەتكىزۋدە توڭكەرىس جاساۋى مۇمكىن، دەپ حابارلايدى infohub.kz.
تۆەنتە ۋنيۆەرسيتەتى مەن رادباۋد مەديسينالىق ورتالىعىنىڭ ماماندارى سىرتقى ماگنيتپەن باسقارىلاتىن قۇرىلعى جاسادى. ماگنيت ءورىسىنىڭ اينالۋى روبوتتى العا جىلجىتىپ، اينالاسىنداعى ءتىندى «بۇراپ» وتەدى. بۇل ءتاسىل پاسيەنتتىڭ باس سۇيەگىن اشپاي-اق ميدىڭ تەرەڭىندەگى ايماقتارعا جەتۋگە مۇمكىندىك بەرەدى.
تەحنولوگيانىڭ باستى ەرەكشەلىگى — قان اعىمى مەن تىندەر ارقىلى زاقىمدانعان جەرگە ەنىپ، كۇردەلى مەديسينالىق وپەراسيالاردى ايتارلىقتاي جەڭىلدەتەدى. قوزعالىس كەزىندە روبوت سىرتقى ماگنيتپەن سينحروندى اينالادى، الايدا اينالۋ جىلدامدىعى تىم جوعارى بولسا، ول باسقارۋدان شىعىپ، رەتسىز قوزعالا باستايدى. بۇل شەك ءتىننىڭ قاتتىلىعىنا بايلانىستى: جۇمساق ورتادا روبوت سەكۋندىنا 30 اينالىمعا دەيىن جەتسە، قاتتىراق ورتادا بۇل كورسەتكىش ءبىر اينالىمنان تومەن تۇسەدى.
ەكسپەريمەنتتەر بارىسىندا روبوت ميدىڭ جۇمساق گەلدىك ۇلگىسىندە جانە ناقتى قوي ميىنىڭ تىنىندە سىنالدى. قان اعىمى بولماعان كەزدە ول ماگنيتپەن سەكۋندىنا شامامەن 1،8 اينالىمعا دەيىن سينحروندى ساقتاسا، قان اينالىمى يميتاسيالانعاندا ءقاۋىپسىز شەك سەكۋندىنا 0،45 اينالىمعا دەيىن تومەندەدى. مي ءتىنى ارقىلى روبوت سەكۋندىنا شامامەن 0،2 مم جىلدامدىقپەن قوزعالسا، كەرى باعىتتا — سەكۋندىنا 2،9 مم-گە دەيىن جەتتى، سەبەبى جاڭا ارنا جاساۋدىڭ قاجەتى جوق.
بەرىلگەن نۇكتەگە جەتۋ دالدىگى ءبىر ميلليمەتردەن از بولدى، بۇل زەرتتەۋشىلەردىڭ پىكىرىنشە، ميدىڭ تەرەڭ بولىكتەرىندەگى ىسىكتەرگە دالىرەك اسەر ەتۋ مۇمكىندىگىن اشادى. ازىرگە تەحنولوگيا تەك زەرتحانالىق جاعدايدا سىنالعان، ءبىراق ول ودان ءارى زەرتتەۋلەردە تيىمدىلىگىن كورسەتسە، باس سۇيەگىن اشپاي-اق ميعا كۇردەلى وپەراسيالار جاساۋعا قولدانىلا الادى.
بۇعان دەيىن شۆەسياداعى گەتەبورگ ۋنيۆەرسيتەتىنىڭ عالىمدارى ناعىز جۇلدىزقۇرت سياقتى قوزعالاتىن ەرەكشە جۇمساق روبوتتى ۇسىنعانى حابارلانعان بولاتىن. بولاشاقتا مۇنداي اپپارات كارىز قۇبىرلارىن تەكسەرۋگە جانە ءتىپتى مارستى زەرتتەۋگە قولدانىلۋى مۇمكىن.