قاراعاندى وبلىسىندا قازاقستاندا العاش رەت جاساندى ينتەللەكت ەلەمەنتتەرى بار روبوت-يت قىزمەتكە كىرىستى، دەپ حابارلايدى infohub.kz.
17–18 شىلدەدە بالقاش پەن تەمىرتاۋدا مەتاللۋرگتەر كۇنىنە ارنالعان مەرەكەلىك شارالار ءوتتى. پوليسيا مالىمەتىنشە، وعان 115 مىڭنان استام ادام قاتىستى. قوعامدىق ءتارتىپتى قامتاماسىز ەتۋ ءۇشىن مىڭنان استام قىزمەتكەر جۇمىلدىرىلدى، ال باستى تەحنولوگيالىق جاڭالىق – ىشكى ىستەر مينيسترلىگىنىڭ اقپاراتتىق بازالارىمەن ينتەگراسيالانعان روبوت-يت بولدى.
جاساندى ينتەللەكت جۇيەسىنىڭ ارقاسىندا قۇرىلعى پوليسيا كورىپ تۇرعان ادامداردىڭ بەت-الپەتىن ناقتى ۋاقىت رەجيمىندە تانيدى. العاشقى كەزەكشىلىك كەزىندە-اق تەحنولوگيا ءتورت ادامدى انىقتاۋعا كومەكتەستى: اليمەنت تولەۋدەن جالتارعان ازامات، ەكى مەملەكەتتىك بورىشكەر جانە بۇرىن سوتتالعان، ۇيدەن تىس جۇرۋگە سوت بەلگىلەگەن شەكتەۋدى بۇزعان ەر ادام. ولاردىڭ بارلىعىنا زاڭدا كوزدەلگەن شارالار قولدانىلدى.
جاپپاي شارالار كەزىندە پوليسەيلەر بالالاردىڭ قاۋىپسىزدىگىنە ەرەكشە كوڭىل ءبولدى. كوپ مىڭداعان قالىڭ جۇرتتىڭ اراسىنان قىزمەتكەرلەر 3 پەن 17 جاس ارالىعىنداعى 87 جوعالعان بالانى تاپتى. ولاردىڭ بارلىعى اتا-انالارىنا جەدەل قايتارىلدى.