قازاقستاندا روبوت-كولىكتەردى ەنگىزۋ بويىنشا پيلوتتىق جوبانىڭ قاعيدالارى بەكىتىلدى. يننوۆاسيالىق كولىكتەردى سىناقتان وتكىزۋ ءۇش قالادا جۇرگىزىلەدى، دەپ حابارلايدى infohub.kz سايتى.
جاساندى ينتەللەكت جانە سيفرلىق دامۋ، كولىك جانە ىشكى ىستەر مينيسترلەرىنىڭ بىرلەسكەن بۇيرىعى 4 تامىزدا قول قويىلدى. قۇجات ەلدە روبوت-كولىكتەردى ەنگىزۋ ءتارتىبىن ايقىندايدى جانە ولاردى پراكتيكالىق قولدانۋدىڭ قۇقىقتىق نەگىزىن قالىپتاستىرادى.
جاساندى ينتەللەكت جانە سيفرلىق دامۋ مينيسترلىگىندە تۇسىندىرگەندەي، قاعيدالار پيلوتتىق جوباعا قاتىسۋشىلارعا، كولىك قۇرالدارىنا، ولاردى پايدالانۋعا رۇقسات بەرۋ شارتتارىنا، سونداي-اق مەملەكەتتىك باقىلاۋ جانە قاۋىپسىزدىكتى قامتاماسىز ەتۋ تەتىكتەرىنە تالاپتار بەلگىلەيدى.
پيلوتتىق جوبا استانا، الماتى جانە قوسشى اۋماقتارىندا ءۇش جىل ىشىندە جۇزەگە اسىرىلادى. اۆتونومدى كولىكتەردى سىناۋ مامانداندىرىلعان پوليگونداردا دا، ۋاكىلەتتى مەملەكەتتىك ورگاندارمەن كەلىسىلگەن جالپى پايدالانىمداعى جولداردىڭ بەلگىلى ءبىر باعىتتارىندا دا جۇرگىزىلۋى جوسپارلانۋدا.
جاڭا قاعيدالاردىڭ باستى ەرەكشەلىكتەرىنىڭ ءبىرى — ءارتۇرلى دەڭگەيدەگى اۆتوماتتاندىرىلعان كولىك قۇرالدارىنا قويىلاتىن تالاپتاردىڭ سارالانۋى. شارتتى اۆتوماتتاندىرىلعان كولىكتەردە كەز كەلگەن ۋاقىتتا باسقارۋدى قولعا الۋعا دايىن ادامنىڭ بولۋى مىندەتتى. جوعارى اۆتوماتتاندىرىلعان كولىكتەردە جۇرگىزۋشىسىز پايدالانۋعا رۇقسات ەتىلەدى، ءبىراق قاشىقتان وپەراتوردىڭ سۇيەمەلدەۋى ۇيىمداستىرىلۋى ءتيىس.
قۇجات سونىمەن قاتار پايدالانۋ قاۋىپسىزدىگىنە قويىلاتىن مىندەتتى تالاپتاردى بەلگىلەيدى. اۆتونومدى كولىك قۇرالدارى دەرەكتەردى تىركەۋ جۇيەلەرىمەن، بەينەباقىلاۋمەن، اۆتوماتتاندىرىلعان باسقارۋ جۇيەسىن اۆاريالىق ءوشىرۋ قۇرالدارىمەن، «اۆتونومدى باسقارۋ» دەگەن ارنايى بەلگىمەن، سونداي-اق باعدارلامالىق قامتاماسىز ەتۋگە سىرتقى ارالاسۋدان قورعاۋ تەتىكتەرىمەن جابدىقتالۋى ءتيىس.
جولاۋشىلاردى تاسىمالداۋ، قۇقىق قورعاۋ ورگاندارىمەن ءوزارا ءىس-قيمىل جانە جول-كولىك وقيعالارى كەزىندەگى ارەكەتتەر ماسەلەلەرىنە ەرەكشە نازار اۋدارىلعان. قاعيدالار تاكسي قىزمەتىن كورسەتۋ جانە تۇراقتى ەمەس جولاۋشىلار تاسىمالى كەزىندە اۆتونومدى كولىكتەردى پايدالانۋ ءتارتىبىن ايقىندايدى، سونداي-اق پيلوتتىق جوبا سۋبەكتىلەرىنىڭ جاۋاپكەرشىلىگىن ساقتاندىرۋ تالاپتارىن بەلگىلەيدى.