Rockstar Games كومپانياسى بەيتانىس ادامدار درون ارقىلى قىزمەتكەرلەردى جۇمىس بارىسىندا تۇسىرە باستاعاننان كەيىن كەڭسە تەرەزەلەرىنە قورعانىش ءۇلبىر ورناتتى. بۇل مالىمەتتەر گلازگوداعى ەڭبەك تريبۋنالىنىڭ قۇجاتتارىنان بەلگىلى بولدى. ءقازىر وندا ستۋديانىڭ 31 قىزمەتكەرىن جۇمىستان شىعارۋ ءىسى قارالىپ جاتىر، دەپ حابارلايدى infohub.kz سايتى.
قۇجاتتاردا كومپانيا ويىنعا قاتىستى قاۋىپسىزدىك ەرەجەلەرىن ەگجەي-تەگجەيلى بايانداعان. كەلۋشىلەر اۋماققا قۇپيالىلىق تۋرالى كەلىسىمگە قول قويعاننان كەيىن عانا جىبەرىلەدى، قاشىقتان جۇمىس ىستەۋ شەكتەلگەن، ال فلەشكا مەن باسقا دا سىرتقى جيناقتاۋشىلاردى پايدالانۋعا تىيىم سالىنعان. سونداي-اق قىزمەتكەرلەرگە جۇمىس ورنىن سۋرەتكە تۇسىرۋگە نەمەسە جەكە قۇرىلعىلاردى ستۋديا جۇيەلەرىنە قوسۋعا بولمايدى.
Rockstar مۇنداي شارالاردى GTA 6 تۋرالى اقپارات الۋعا تىنىمسىز جاسالعان ارەكەتتەرمەن تۇسىندىرەدى. كومپانيانىڭ ايتۋىنشا، قىزمەتكەرلەر فيشينگ پەن حاكەرلەردىڭ باسقا دا ايلا-تاسىلدەرىنە تاپ بولادى، ال ويىن جانكۇيەرلەرى كەڭسەلەردى باقىلاپ، ءتىپتى جاناما بەلگىلەر ارقىلى جاڭا ماتەريالداردىڭ شىعۋ كۇنىن بولجاۋعا تىرىسادى.
ستۋديا 2022 جىلى بولعان بۇزۋشىلىق تۋرالى دا ايتىپ بەردى. سول كەزدە قاسكوي ءبىر قىزمەتكەردىڭ كومپيۋتەرىنە قول جەتكىزىپ، GTA 6-نىڭ اياقتالماعان ماتەريالدارى بار ونداعان بەينەنى ۇرلاپ كەتكەن.
قازىرگى تاڭدا Rockstar قىزمەتكەرلەردى جۇمىستان شىعارعانى ءۇشىن Independent Workers of Great Britain كاسىپوداعىمەن دە سوتتاسىپ جاتىر. كاسىپوداق جۇمىسشىلاردى كاسىپوداق قىزمەتى ءۇشىن جۇمىستان شىعاردى دەپ مالىمدەسە، كومپانيا ويىن ازىرلەۋگە قاتىستى قۇپيا اقپاراتتىڭ اعىپ كەتۋى سەبەپ بولدى دەپ تالاپتانىپ وتىر.
بۇعان دەيىن Kursiv LifeStyle GTA 6-نىڭ جاساۋشىلارى ميللياردتاعان دوللار شىعىنعا ۇشىراعانى ءۇشىن اقپاراتتى اعىزعانداردى ىزدەۋگە كىرىستى دەپ جازعان بولاتىن.