جىلداعى ەڭ كۇتىلگەن ۇيلەنۋ تويىنىڭ جۇمباعى شەشىلۋگە جاقىن. بريتاندىق The Sun باسىلىمىنىڭ حابارلاۋىنشا، اتاقتى پورتۋگاليالىق فۋتبولشى كريشتيانۋ رونالدۋ مەن ونىڭ سۇيىكتىسى دجوردجينا رودريگەس وسى سەنبىدە، 8 تامىزدا ۇيلەنۋ تويىن وتكىزەدى. جۇپتىڭ كوپتەن كۇتكەن وقيعاعا قالاي دايىندالىپ جاتقانىن Kursiv LifeStyle باياندايدى... دەپ حابارلايدى infohub.kz.
باسىلىمنىڭ مالىمەتىنشە، ءراسىم فۋتبولشىنىڭ تۋعان جەرى — پورتۋگاليانىڭ مادەيرا ارالىندا ءوتۋى مۇمكىن. ۆەنچانيە ءۇشىن فۋنشال قالاسىنداعى سوبوردى الدىن الا برونداپ قويعان دەلىنەدى.
توي، رودريگەس بۇرىننان قالاعانداي، قاراپايىم ءارى بوگدە كوزدەردەن جابىق وتەدى دەپ كۇتىلۋدە. جاقىندا جانكۇيەرلەر جۇپتىڭ ياحتادا دەمالىپ جۇرگەنىندە ساۋساقتارىنداعى نەكە جۇزىكتەرىن بايقاعان.
ۇيلەنۋ تويى تۋرالى قاۋەسەت بىرنەشە اپتا بويى تاراپ ءجۇر. بۇعان دەيىن شەتەلدىك ب ا ق جۇپ تامىزدىڭ العاشقى دەمالىس كۇندەرى جاسىرىن ءراسىم وتكىزۋدى جوسپارلاپ وتىرعانىن جازعان. الايدا ول كەزدە توي بولمادى. كەيىن رونالدۋدىڭ اپكەسى كۇن ءالى بەلگىلەنبەگەنىن مالىمدەدى.
بۇل جۇپتىڭ تاريحى ناعىز ەرتەگىگە ۇقسايدى. ولار 2016 جىلى مادريدتە تانىسقان، سول كەزدە رودريگەس Gucci دۇكەنىندە قاراپايىم ساتۋشى بولىپ جۇمىس ىستەگەن.
ءقازىر ولار ورتاق ەكى قىزىن قوسا ەسەپتەگەندە بەس بالا تاربيەلەپ وتىر.
بىرگە وتكىزگەن 10 جىلعا جۋىق ۋاقىت ىشىندە جۇپ كوپ نارسەنى باستان وتكەردى: ەلدەن ەلگە كوشۋ، ورلەۋ، قيىندىقتار مەن وتباسىلىق قايعىلار.
2025 جىلدىڭ تامىزىندا رودريگەس ءساندى جۇزىكتىڭ سۋرەتىن جاريالاپ: «ءيا، مەن كەلىسەمىن. وسى ومىردە دە، بارلىق ومىرىمدە دە» دەگەن جازۋمەن نەكە قيۋ تۋرالى حابارلاعان.
41 جاستاعى شابۋىلشى مەن ونىڭ قالىڭدىعى ناقتى كۇن تۋرالى ازىرگە تۇسىنىكتەمە بەرمەيدى، ءبىراق الەمنىڭ تۇكپىر-تۇكپىرىندەگى جانكۇيەرلەر ساۋساقتارىن ايقاستىرىپ، توي كويلەگىندەگى العاشقى كادرلاردى كۇتۋدە.
بۇعان دەيىن Kursiv LifeStyle پورتۋگاليالىق V+ Fama تەلەباعدارلاماسى ەفيردە كريشتيانۋ رونالدۋ مەن دجوردجينا رودريگەستىڭ ۇيلەنۋ تويىنا شاقىرتۋدى كورسەتكەنىن جازعان. وندا ءراسىمنىڭ كۇنى، ۋاقىتى مەن ورنى كورسەتىلگەن.