رەسەيدىڭ يركۋتسك وبلىسىندا ءسىبىر مەن قيىر شىعىستىڭ وباعا قارسى ينستيتۋتى قىزمەتكەرىنىڭ رەسمي دياگنوزى جاريالاندى. بۇعان دەيىن ب ا ق ونىڭ قايتىس بولعانىن حابارلاعان ەدى. روسپوترەبنادزوردىڭ مالىمدەۋىنشە، قىزمەتكەر پنەۆمونيادان كوز جۇمعان، دەپ جازادى infohub.kz سايتى.
تاسس ۆەدومستۆونىڭ تۇسىنىكتەمەسىنە سىلتەمە جاساي وتىرىپ، مارقۇمدا ەتيولوگياسى انىقتالماعان پنەۆمونيا انىقتالعانىن حابارلادى. روسپوترەبنادزوردىڭ ناقتىلاۋىنشا، ناۋقاستان الىنعان ماتەريالدى كەڭەيتىلگەن زەرتتەۋ ناتيجەلەرى ونىڭ كاسىبي قىزمەتىنە قاتىستى ميكروورگانيزمدەردىڭ بار ەكەنىن كورسەتكەن جوق.
ريا ءنوۆوستيدىڭ حابارلاۋىنشا، ۆەدومستۆو ينستيتۋت قىزمەتكەرىمەن بايلانىستا بولعان ادامداردىڭ ەشقايسىسىندا ينفەكسياعا بايلانىستى جاعداي وزگەرىسى انىقتالماعانىن دا اتاپ ءوتتى.
«بايلانىستا بولعانداردىڭ ەشقايسىسىندا ينفەكسيالىق پاتولوگياعا بايلانىستى دەنساۋلىق جاعدايىنىڭ وزگەرىسى انىقتالعان جوق»، — دەلىنگەن حابارلامادا.
سونىمەن قاتار ينستيتۋتتا پاتوگەندى ميكروورگانيزمدەرمەن جۇمىس ىستەۋ كەزىندە اپاتتار تىركەلمەگەنى اتاپ ءوتىلدى. تەكسەرۋ مارقۇممەن بايلانىستا بولعان ينستيتۋت قىزمەتكەرلەرىندە دە پاتولوگيا تاپپادى.
«COVID-19-دىڭ ەكى جاعدايى جانە رينوۆيرۋستىق ينفەكسيانىڭ ەكى جاعدايى انىقتالدى، باسقا ينفەكسيالىق اۋرۋلاردىڭ قوزدىرعىشتارى تابىلعان جوق»، — دەپ حابارلادى روسپوترەبنادزور.
ەسكە سالايىق، بۇعان دەيىن ب ا ق رەسەيدىڭ يركۋتسك وبلىسىندا 27 جاستاعى قىز وباعا كۇدىكپەن قايتىس بولعانىن حابارلاعان ەدى.