رەسەيدىڭ يركۋتسك وبلىسىندا وباعا قارسى ينستيتۋت قىزمەتكەرىنىڭ قايتىس بولۋى تۋرالى اقپارات الەۋمەتتىك جەلىلەردە كەڭ رەزونانس تۋدىردى. وبا ىندەتىنىڭ ءورشۋى جانە كارانتين ەنگىزىلۋى مۇمكىن دەگەن قاۋەسەتكە روسپوترەبنادزور تۇسىنىكتەمە بەرۋگە ءماجبۇر بولدى. ۆەدومستۆو ءوڭىر تۇرعىندارىنا وبا ءقاۋىپ توندىرمەيتىنىن مالىمدەدى، دەپ حابارلايدى infohub.kz سايتى.
قارساڭىندا «ليۋدي بايكالا» باسىلىمى ينستيتۋتتىڭ 28 جاستاعى قىزمەتكەرى داريا شيپيلوۆا 2 قازانعا قاراعان ءتۇنى شەلەحوۆ اۋرۋحاناسىندا كوز جۇمعانىن حابارلاعان. باسىلىم جۋرناليست پاۆەل ستەپانوۆتىڭ جانە Mash Telegram-ارناسىنىڭ نۇسقاسىن كەلتىردى: 25 قىركۇيەكتە ايەل زەرتحانادا وبا قوزدىرعىشى سالىنعان پروبيركانى سىندىرعان بولۋى مۇمكىن. الايدا بۇل نۇسقا رەسمي راستاۋعا يە بولمادى.
4 قازاندا «ليۋدي بايكالا» يركۋتسكىنىڭ №1، №3 جانە №10 قالالىق كلينيكالىق اۋرۋحانالارىندا، يۆانو-ماترەنين بالالار اۋرۋحاناسىندا جانە كەمىندە ءبىر پەرزەنتحانادا ءۇش اپتالىق كارانتين ەنگىزىلگەنىن حابارلادى. جۋرناليستەردىڭ دەرەگىنشە، ناۋقاستارعا كىرۋگە تىيىم سالىنعان، ءبىراق زاتتار مەن ازىق-ت ۇلىك جىبەرۋگە رۇقسات ەتىلگەن.
باسىلىمنىڭ دەرەككوزدەرى شەكتەۋلەردى وباعا كۇدىكپەن بايلانىستىرادى. الايدا ولاردىڭ ايتۋىنشا، اۋرۋحانالارعا كەلىپ تۇسەتىن قۇجاتتاردا مۇنداي دياگنوز كورسەتىلمەگەن. جۋرناليستەر بارلىق مەديسينالىق مەكەمەلەردەگى كارانتيندى راستاي المادى.
ينتەرفاكس اگەنتتىگىنىڭ دەرەگىنشە، 4 قازاندا ۆەدومستۆو ايەلگە سەبەبى انىقتالماعان پنەۆمونيا دياگنوزى قويىلعانىن حابارلادى. كەڭەيتىلگەن زەرتتەۋلەر ونىڭ بيوماتەريالىنان كاسىبي قىزمەتىنە قاتىستى ميكروورگانيزمدەردى انىقتاعان جوق.
«يركۋتسك وبلىسىندا، يركۋتسك جانە شەلەحوۆ قالالارىندا سانيتارلىق-ەپيدەميولوگيالىق جاعداي تۇراقتى»، — دەدى روسپوترەبنادزوردىڭ ءباسپاسوز قىزمەتى.
سوڭعى ون كۇندە باسقا قىزمەتكەرلەر اراسىندا جۇقپالى اۋرۋلارعا قاتىستى ءوتىنىش تىركەلگەن جوق.
ناۋقاسپەن بايلانىستا بولعاندار ستاسيوناردا مەديسينالىق باقىلاۋعا الىندى. ولاردىڭ اراسىنان COVID-19-دىڭ ەكى جاعدايى جانە رينوۆيرۋستىق ينفەكسيانىڭ ەكى جاعدايى انىقتالدى. باسقا جۇقپالى اۋرۋلاردىڭ قوزدىرعىشتارى تابىلعان جوق، دەپ جازادى «ۆەدوموستي» روسپوترەبنادزورعا سىلتەمە جاساپ.
بۇعان دەيىن دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس گەبرەيەسۋس نيۋ-يوركتە بىرىككەن ۇلتتار ۇيىمى باس اسسامبلەياسىنىڭ وتىرىسى اياسىندا وتكەن ءباسپاسوز كونفەرەنسياسىندا جاڭا پاندەميا ءسوزسىز بولاتىنىن، بۇل تەك ۋاقىت ماسەلەسى ەكەنىن مالىمدەدى.