رەسەي ۋكرايناداعى جانجالدى ساياسي-ديپلوماتيالىق جولمەن رەتتەۋگە جانە جاڭا ۇسىنىستاردى تالقىلاۋعا دايىن ەكەنىن راستادى، دەپ حابارلايدى infohub.kz سايتى.
بريفينگتە رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆا: «ءبىز ءوز تاراپىمىزدان ۋكراينا داعدارىسىن ساياسي-ديپلوماتيالىق جولمەن رەتتەۋگە دايىن ەكەنىمىزدى راستايمىز، ءبىز بۇدان ەشقاشان باس تارتقان ەمەسپىز، ءبىراق ءوزارا تۇسىنىستىك نەگىزىندە، ونىڭ ىشىندە الياسكادا قول جەتكىزىلگەن كەلىسىمدەردى ەسكەرە وتىرىپ»، — دەدى. سونداي-اق ول ماسكەۋ رەتتەۋ بويىنشا ىقتيمال باستامالار مەن ۇسىنىستاردى تالقىلاۋعا دايىن ەكەنىن اتاپ ءوتتى: «ءبىز بۇدان ەشقاشان باس تارتقان ەمەسپىز».
بۇعان دەيىن قازاقستان پرەزيدەنتى قاسىم-جومارت توقايەۆ ومبىدا رەسەي پرەزيدەنتى ۆلاديمير پۋتينمەن كەزدەسۋدە اسكەري ءىس-قيمىلداردى توقتاتۋعا شاقىرعان بولاتىن. رەسەي پرەزيدەنتىنىڭ ءباسپاسوز حاتشىسى دميتري پەسكوۆ توقاەۆتىڭ سوزدەرى ولار ءۇشىن كۇتپەگەن جاعداي بولماعانىن ايتتى. ال ۋكراينا سىرتقى ىستەر ءمينيسترى اندرەي سيبيگا قاسىم-جومارت توقاەۆتى ۋكرايناداعى سوعىستى توقتاتۋعا شاقىرعانى ءۇشىن العىس ءبىلدىرىپ، بۇل مالىمدەمەنى «شىنايى، ۋاقتىلى جانە دانا سيگنال» دەپ اتادى.